«Ես առաջնորդվելու եմ իմ սկզբունքներով և իմ խղճով, և իմ մոտեցումները, քաղաքական սկզբունքները փոփոխության չեն կարող ենթարկվել»,- այս մասին «Առաջին լրատվական»- ի հետ զրույցում ասաց ՀՀՇ վարչության նախագահ Արարատ Զուրաբյանը, անդրադառնալով դիտարկմանը, որ ինքը միշտ կողմ է եղել, որ Հայաստանը գնա եվրաասոցացման ուղով, իսկ «Ծառուկյան» դաշինքը, որով նա առաջադրվել է, կողմ է ԵԱՏՄ-ին:
«Պետք է արձանագրենք, որ Հայաստանը այսօր ԵՏՄ անդամ է, բայց գոնե այն ռեսուրսները, որ կարող էր օգտագործել այս հարթակում որոշակի տնտեսական արդյունքներ արձանագրելու համար, նորմալ չեն օգտագործվել»,- նշեց Լ. Զուրաբյանը՝ հավելելով, որ եթե շարունակվեն քննարկումներն այն մասին, թե որտեղ է հայտնվելու Հայաստանը, ինքը կլինի եվրաինտեգրման կողմնակից:
Նրա կարծիքով՝ որևէ խմբակցություն չի առաջնորդվում զինվորական կարգապահությամբ, որոշ հարցերում խմբակցության անդամները կարող են ունենալ այլ մոտեցումներ կամ ձեռնպահ մնալ այս կամ այն հարցի վերաբերյալ իրենց մոտեցումներն արտահայտելիս և քվեարկելիս:
Զուրաբյանի խոսքով՝ ՀՀՇ -ում ընդգրկված մարդկանցից շատերը շարունակելու են զբաղվել քաղաքականությամբ: «Քաղաքական գործունեությունը պրագմատիկ մոտեցումներով գործունեության տեսակ է, պետք է հաշվի առնել այն իրողություները, որոնք առկա են: Ես նախընտրել եմ մասնակցել այս պրոցեսին… Կան մարդիկ, որոնք ունեն այլ տեսակետ, հարգում եմ նրանց տեսակետը, բայց չեմ կիսում»:
Անդրադառնալով դիտարկմանը, որ կա տեսակետ, թե «Ծառուկյան» դաշինքում ներգրավվել են մարդիկ, ովքեր խռովել, հեռացել են ՀՀԿ-ից և շատերն ասում են՝ ՀՀԿ-ում տեղ չկար, որոշեցինք «Ծառուկյան» դաշինքով առաջադրվել, Լ. Զուրաբյանը նշեց, որ այդ ձևակերպումը լավ կատակ էր. «Իսկ ինչ վերաբերում է նեղացածներին, ապա ՀՀԿ-ն ՀՀՇ-ից նեղացածների խումբն էր, որ հեռացան և համալրեցին փոքր ՀՀԿ-ն: Ես գտնում եմ, որ ձևակերպումը կոռեկտ չէ, ձևավորված են քաղաքական թիմեր, լինում են որոշակի փոփոխություններ, վատ է, որ Հայաստանում այսպես է, բայց սա մեր հայկական իրականության վառ արտահայտությունն է, առաջին դեպքը չէ»:
Արարատ Զուրաբյանը չբացառեց, որ կարող է փողոցային պայքար լինել. «Գտնում եմ, որ անարդարության դեմ միշտ էլ պետք է պայքարել: Բայց կարծում եմ այս անգամ ՀՀԿ-ն կգնա այլ ճանապարհով, որովհետև մշտապես ընտրությունների արդյունքները կեղծելու ճանապարհով գնալը իրոք հղի է լուրջ վտանգներով»:
Մանրամասները՝ տեսանյութում:
