Ատոմային էներգիայի միջազգային գործակալությունը (ԱԷՄԳ) այսօր կտարածի Իրանի հարցով կառավարիչների խորհրդի գերագույն տնօրենի հերթական եռամսյակային զեկույցը: Ինչպես հաղորդում է ITAR-TASS-ը՝ վկայակոչելով ԱԷՄԳ-ին մոտ կանգնած իր դիվանագիտական աղբյուրին, միջազգային կազմակերպության փորձագետները այս անգամ զերծ կմնան Թեհրանի քաղաքականությանը կտրուկ գնահատականներ տալուց:
«Կարծում եմ՝ փաստաթուղթն այս անգամ շատ «հարթ» կլինի»,- ասել է աղբյուրը՝ հիշեցնելով, որ նախորդ զեկույցը, որը հրապարակվել էր Իրանի նախագահական ընտրություններից առաջ, գրված էր կոշտ ոճով:
Գործակալության զրուցակիցը վստահ է, որ այժմ ոչ ոք չի սրի իրավիճակը, և, ամենայն հավանականությամբ, զեկույցում կլինեն փաստեր՝ առանց որևէ գնահատականների:
Նրա կարծիքով՝ ԱԷՄԳ-ի ղեկավարությունը սպասում է մինչև Թեհրանը որոշի գործակալության հետ բանակցություններում իր վարքը և թիմ ձևավորի:
«Այն, որ Սուլթանիան (Իրանի ներկայացուցիչն ԱԷՄԳ-ում) հեռանում է, արդեն առաջին ազդանշանն է»,- նշել է նա:
ԱԷՄԳ-ի կառավարիչների խորհրդի նիստը, որտեղ կքննարկվի գերագույն տնօրենի զեկույցը, նախատեսված է սեպտեմբերի 9-13-ին:
