Որոշ տեղեկություններով` «Բարգավաճ Հայաստան» կուսակցությունն այս օրերին փորձում է համակարգել իրենց սոցիալական վիճակից դժգոհող և երկրում համակարգային փոփոխություններ պահանջող ազատամարտիկների խմբերը և այդ հարցում ԲՀԿ-ի գործընկերն է ՀԱԿ-ը, և որ այդ գործում նրանց օգնում են նախկին ԵԿՄ-ականներ Գագիկ Ջհանգիրյանն ու Հակոբ Հակոբյանը (Լեդի Հակոբ), ովքեր ազատամարտիկների շրջանում ունեցած իրենց հեղինակությամբ փորձում են օգնել ԲՀԿ-ի վերոնշյալ նախաձեռնությանը: «Առաջին լրատվական»-ի հետ զրույցում, սակայն, նախկին ԵԿՄ-ական, «Ոգու փորձություն» կազմակերպության հիմնադիր Հակոբ Հակոբյանը պնդեց, որ իր հետ որևէ բանակցություններ չեն տարվել:
– Պարոն Հակոբյան, տեղեկություններ կան, որ ԲՀԿ-ն այսօր փորձում է բանակցություններ վարել Ձեզ հետ ազատամարտիկների շարժման հետ կապված: Դա ճի՞շտ է:
– Իմ հետ էդ տիպի խոսակցություն չի եղել, չնայած Ծառուկյան Գագիկը ինձ հարազատ մարդ ա: Կարող ա էդ տղեքի հետ եղել ա, բայց իմ հետ` չէ:
– Կոնկրետ Ձեր հետ հանդիպումներ չե՞ն եղել ազատամարտիկների շարժումը այս կամ այն ուղղությամբ տանելու առթիվ:
– Չէ: Մենք չենք հանդիպել: Պատահական կարող ա ինչ-որ դժբախտություն կամ տենց մի բան լինի, հանդիպած լինենք, բայց որևիցե մի թեմա չի խոսացվել: Ես մենակ գեներալ Մանվելի հետ եմ հանդիպել, Սարոյան Սեյրանի, իրանք խոսացել են, ես ընդունել եմ, որ էդ օրենքը ճիշտ ա, վատ չի: Ազատամարտիկների հարցը էս երկրում մենակ մի մարդ պետք ա լուծի, մնացածը սաղ քամի են անում, ո՞վ ա անող: Եթե Սերժը կլուծի Սարգսյան, կլուծի, մնացածը հարց լուծող չեն: Երբ հրահանգ տվեց, կլուծվի, չտվեց, չի լուծվի: Մնացածը ոչ մեկ խնդիր լուծող չեն:
– Այսինքն` ԲՀԿ-ն խնդիր լուծող չի՞:
– Դե պարզ ա, ոչ մեկ էլ խնդիր չի կարա լուծի, ո՞վ կարա լուծի: Անձնապես կարող ա Ծառուկյան Գագիկը լուծի, բայց մնացածը ոչ մեկ չեն կարա քաղաքական խնդիր լուծեն, բացի մի մարդուց:
– Իսկ Ձեր կարծիքով` ինչո՞ւ Սերժ Սարգսյանը չի լուծում:
– Չգիտեմ` ինչ կլինի, երևի ինքը ավելի լավ գիտի իրավիճակը: Էդ խնդիրը շուտվանից ա եղել: Էդ հարցերով ես միշտ խոսացել եմ իրանց հետ, վիճաբանել եմ: Իմ հիմնական խնդիրը իրանց հետ էդ ա եղել:
– Պարոն Հակոբյան, իսկ ինչպե՞ս եք գնահատում ազատամարտիկների պայքարը և այն, ինչ կատարվում է Ազատության հրապարակում:
– 1994 թվականից ես անընդհատ պայքարել եմ, որ բոլոր ազատամարտիկների վիճակը կարգավորվի, ինչ ի վիճակի էի, արել եմ: Էդ պրոբլեմին և էսօրվա նախագահը, և նախկին նախագահն ու վարչապետը տեղյակ են եղել: Ես որ էսօրվա նախագահի կողքից գնացել եմ, ինքն էլ գիտի` պատճառն ինչն ա եղել, որովհետև ազատամարտիկներն էդ վիճակին են եղել: Իրանց բողոքը լրիվ ճիշտ ա, բոլորն էլ լավ գիտեն:
– Այդ դեպքում ինչո՞ւ Դուք այսօր Ազատության հրապարակում չեք:
– Ես իրանց` ղեկավարների դեմ եմ ասել, ուղիղ ասել: Իրանք դա լավ գիտեն: Էսօր իշխանությունները պետք ա լրիվ հասկանան, որովհետև մեր սերունդն ա դա տեսնում: Վաղը եթե, Աստված չանի, պատերազմ լինի, էդ հոգին երեխեքին ա փոխանցվում: Իրանք ի՞նչ հոգով պետք ա պայքարեն, եթե տեսնեն, որ իրանցից մեծերը, որ կամավոր մասնակցեցին, պատերազմը հաղթեցին, սենց ճակատագրի են արժանացել: Ես ասել եմ, որ օրենք ա ընդունված: Էդ օրենքը, ինձ թվում ա, նորմալ ա, լավ ա: Ես հանդիպել եմ գեներալ Մանվելի հետ, ինքը ինձ բացատրել ա, ես ընդունում եմ, լրիվ ճիշտ ա: Վատ օրենք չի, լավ ա:
– Ձեր կարծիքով` ազատամարտիկները չգիտե՞ն օրենքի մասին, որ նստացույց են անում Ազատության հրապարակում: Եթե տեղյակ եք, օրենքը ազատամարտիկների սոցիալական խնդիրը չի լուծում:
– Կարևորը, որ էս օրենքով պատերազմի մասնակից ազատամարտիկին կարգավիճակ տան, իրան մարդ զգա էս երկրում, որովհետև էդ տարբերակն էլ չկա: Ես չեմ ասում` իրանք սխալ են անում, իրանք ճիշտ են անում: Ես մտածում եմ` էս օրենքի հետևանքներ էլ կլինեն, շարունակական կլինի:
– Սակայն ի՞նչ երաշխիք կա, որ օրենքը շարունակություն կունենա, քանի որ կառավարությունը հայտարարում է, որ փող չկա ազատամարտիկների թոշակները բարձրացնելու համար:
– Ոչ մի բանի երաշխիք չկա: Վաղը որ ուզենան, էդ տղեքին էլ սաղին կտանեն, ամենքին մի պոչ կպցնեն, կասեն` սենց ա եղել, ոնց որ մեզ արեցին: …Ես հավատում եմ Մանվելի ասածին, որովհետև ասեց` էդ ամեն ինչը հերթականությամբ ինքը կանի: Կամավոր ազատամարտիկներին ստատուս կտան, հետո կանցնեն մնացած հարցերին: Էդքան էլ շատ չեն, ամենաշատը 6-7 հազար մարդ ա եղել կամավոր:
– Փաստորեն Մանվել Գրիգորյանը կարողացե՞լ է Ձեզ համոզել, չնայած միգուցե քաղաքական կոնյունկտուրայից ելնելով է ասում, որ շատ լավ օրենք է:
– Ինքը ինձ չի համոզել: Ինքը ինձ բացատրել ա էդ օրենքը, որովհետև իրոք շատ լավ ա ընդունված: Գոնե տարբերվեն, թե էդ մի քանի հազար մարդիկ ովքեր էին, որ իրանց ընտանիքից, երեխեքից կտրվեցին, իրանց կյանքը վտանգի տակ դրեցին: …Մեր նկատմամբ իրավունք չունեն քաղաքականություն խաղալու:
– Ձեր կարծիքով` ազատամարտիկների շարժումը, նստացույցը ինչի՞ կհանգեցնեն, դրական տեղաշարժ կլինի՞:
– Ինչ էլ որ լինում ա, դրական հետևանք ունենալու ա, չի կարա չունենա:
– Սակայն իշխանությունը ամիսներ շարունակ անտեսում է իրենց պայքարը:
– Դե հիմա ժամանակի խնդիր ա: Կարող ա բոլորս ուզում ենք, որ էսօր լուծվի: Էդ օրենքը, որ ընդունվեց, մեծ օրենք էր, հաջորդ քայլն էլ հնարավոր ա արվի, չի բացառվում: 16-17 տարի ես եմ ղալմաղալ արել իրանց հետ, միշտ անընդհատ կռիվ էի անում բոլորի հետ:
– Պարոն Հակոբյան, իսկ Ձեր հարաբերությունները ՀԱԿ-ի հետ ինչպի՞սին են այսօր:
– Լևոն Տեր-Պետրոսյանն իմ համար մեծություն ա, ես իրան անհատ որպես ընդունում եմ, մնացածները ոնց որ մյուս կուսակցությունները: Էնտեղ մի քանի մարդ կա, որոնց ես իրոք ընդունում եմ ու հպարտ եմ, որ իրանց կողքին եմ ես:
