Դավիթ Տոնոյանը նշանակվեց ԱԻ նախարար

 

Պաշտպանության փոխնախարար Դավիթ Տոնոյանը ՀՀ Նախագահի հրամանագրով նշանակվել է արտակարգ իրավիճակների նախարար, այս մասին տեղեկացնում է ՀՀ Նախագահի աշխատակազմի հասարակայնության և տեղեկատվության միջոցների հետ կապերի վարչությունը։

« Հիմք ընդունելով Հայաստանի Հանրապետության Նախագահի 2007 թվականի հուլիսի 18-ի ՆՀ-174-Ն հրամանագրով սահմանված՝ Հայաստանի Հանրապետության կառավարության և նրան ենթակա պետական կառավարման այլ մարմինների գործունեության կազմակերպման կարգի 125-րդ կետը` ո ր ո շ ու մ ե մ.

Դավիթ ՏՈՆՈՅԱՆԻՆ ազատել Հայաստանի Հանրապետության պաշտպանության նախարարի առաջին տեղակալի պաշտոնից»,– ասվում է ՀՀ Նախագահի հրամանագրում։

Կենսագրություն

·        1991 թ. ավարտել է Երևանի պետական համալսարանի երկրաբանական ֆակուլտետը։

·        1997 թ. ավարտել է Ռուսաստանի Դաշնության ռազմադիվանագիտական ակադեմիան։

·        1986-1988 թթ. ծառայել է Խորհրդային բանակում։

·        1992-1994 թթ. ծառայել է ՀՀ ՆԳՆ Կազմակերպված հանցավորության դեմ պայքարի գլխավոր վարչությունում։

·        1994 թ. զինվորական ծառայության է անցել ՀՀ ՊՆ ռազմական ոստիկանության վարչությունում որպես բաժնի պետ։

·        1997 թ. ծառայության է անցել ՀՀ ՊՆ սպառազինության վարչության սպա։

·        2004-2007 թթ. ՆԱՏՕ-ում ՀՀ ԶՈՒ ներկայացուցիչ։

·        2007-2008 թթ. ՀՀ ՊՆ միջազգային ռազմական համագործակցության և պաշտպանական ծրագրերի վարչության պետ։

·        2008-2010 թթ. ՀՀ ՊՆ պաշտպանական քաղաքականության վարչության պետ։

·        2010 թ. հոկտեմբերի 2-ին ՀՀ Նախագահի հրամանագրով նշանակվել է ՀՀ պաշտպանության նախարարի առաջին տեղակալ։

Պարգևատրվել է 

·        «Հայրենիքին մատուցած ծառայությունների համար» 1-ին աստիճանի մեդալ (2012)։

·        «Հայրենիքին մատուցած ծառայությունների համար» 2-րդ աստիճանի մեդալ (2008)։

·        ՀՀ ՊՆ «Անբասիր ծառայության համար» 1-ին, 2-րդ և 3-րդ աստիճանի մեդալներ։

·        ՀՀ ՊՆ «Վազգեն Սարգսյան» մեդալ։

·        ՀՀ ՊՆ «Անդրանիկ Օզանյան» մեդալ։

·        «Հայրենիքին մատուցած ծառայությունների համար» 2-րդ աստիճանի շքանշան:
Ամուսնացած է, ունի դուստր և որդի։ Ձյուդոյի սպորտի վարպետ է: