2016թ. Հայաստանի բանկային համակարգի ընդհանուր վարկային պորտֆելն աճել է 20,5%-ով և կազմել ավելի էան 2,5 տրիլիոն դրամ:
17 բանկերից 14-ը գրանցել են վարկային ներդրումների աճ, ընդ որում հիմնականում երկնիշ աճ: Բանկային համակարգի առաջին եռյակը 2016թ. զգալիորեն ավելացրել է վարկավորման ծավալները: Այսպես` «Ամերիաբանկ»-ի վարկային պորտֆելը տարեկան արդյունքներով կազմել է 505,6 մլրդ դրամ, «Արդշինբանկ»-ինը` 337,6 մլրդ դրամ, «Հայբիզնեսբանկ»-ինը`268,5 մլրդ դրամ: Աճել է նաև վարկերի գծով այդ բանկերի տեսակարար կշիռը բանկային համակարգի ընդհանուր վարկային ներդրումների մեջ: Այսպես` «Ամերիաբանկ»-ի մասնաբաժինն աճել է մինչև 19,7 %, «Արդշինբանկ»-ինը՝ 13,1%, «Հայբիզնեսբանկ»-ինը` 10,4%: Իսկ այս երեք բանկերի ընդհանուր մասնաբաժինը բանկային համակարգի վարկային ներդրումների մեջ կազմում է 43,4%: Ուշագրավ է «Ամերիաբանկ»-ի դիրքերի առավել ամրապնդումը բանկային համակարգում, փաստացի ամբողջ բանկային համակարգի վարկային ներդրումների գրեթե 1/5-ը բաժին է ընկնում այս բանկին, ի դեպ, դոլարային արտահայտությամբ, բանկի վարկային պորտֆելը հատել է 1մլրդ ԱՄՆ դոլարի սահմանը:
Երեք խոշոր բանկերը` «ԱԿԲԱ-Կրեդիտ Ագրիկոլ», «ՎՏԲ Հայաստան» և «Էյչ-Էս-ԲԻ-Սի Հայաստան» բանկերը տարին եզրափակել են վարկային պորտֆելի կրճատմամբ, ընդ որում «ԱԿԲԱ-Կրեդիտ Ագրիկոլ» բանկի պորտֆելը կրճատվել է 2,1%-ով, իսկ «ՎՏԲ Հայաստան» և «Էյչ-Էս-ԲԻ-Սի Հայաստան» բանկերինը համապատասխանաբար`24,4%-ով և 26,2%-ով, և այս երկու բանկերի դիրքերը բանկային համակարգում վատթարացել են:
Շուկայի ամենամեծ անակնկալը եղավ «Անելիք» բանկի վարկային պորտֆելի կտրուկ աճը` 252,4%, որի արդյունքում բանկի պորտեֆլը հասավ 217,5 մլրդ դրամի, որը բանկին հնարավորություն ընձեռեց վարկային ներդրումներով զբաղեցնել 4-րդ տեղը բանկային համակարգում: