Լեհական Rzeczpospolita թերթը պնդում է, որ մի խումբ ռուս ցանցահեններ փորձել են հարձակվել երկրի ԱԳՆ համակարգի վրա։ Այս մասին հաղորդում է RIA Novosti-ն։
Պարբերականի տվյալներով՝ ռուս ցանցահենները 2016թ․ դեկտեմբերին փորձել են կոտրել Լեհաստանի ԱԳՆ-ի կայքը, երբ գերատեսչության մի քանի աշխատակիցներ էլեկտրոնային նամակներ են ստացել ՆԱՏՕ-ի գլխավոր քարտուղարի հայտարարության վերաբերյալ։ Նամակներին կցված է եղել հավելված, որը բացելուց հետո համակարգիչների վրա վիրուսային ծրագիր է ներբեռնվել, ինչը թույլ է տալիս գողանալ տվյալները։
«Գործը բարդացնում է այն փաստը, որ հարձակումն իրականացվել է Լատինական Ամերիկայի երկրներից մեկի ԱԳՆ-ի սերվերների կիրառմամբ»,-մեջբերում է պարբերականի Լեհաստանի ԱԳՆ մամուլի ծառայության խոսքերը։
