ԱՍԱԼԱ-ի ազատամարտիկ, «Վան» գործողության հրամանատար Վազգեն Սիսլյանը «Առաջին լրատվական»-ի հետ զրույցում անդրադարձավ կինոռեժիսոր Արշակ Զաքարյանի և ԱԳՆ մամուլի խոսնակ Տիգրան Բալայանի միջև ծագած առցանց բանավեճին: Արշակ Զաքարյանն իր ֆեյսբուքյան էջում գրել էր, որ վերջին օրերին հակառակորդի կողմից ակտիվություն է նկատվում, հակառակորդի դիպուկահարները էլի սկսել են ակտիվ աշխատել, սակայն մեր ԱԳՆ-ն չի բարձրաձայնում այդ մասին: Նա նաև գրել էր, որ ադրբեջանցիները «նույնիսկ իրենց սատկած էշին են մեզ վերագրում, իսկ մեր դիվանագիտություն էդ նույն սատկած էշի ականջին քնած է…»:
Այս գրառմանը շատ կոշտ, անձնական վիրավորանքներիի տիրույթում էր արձագանքել ԱԳՆ մամուլի խոսնակը՝ նշելով, որ «միջակություններն իրենց իրավունք են վերապահում քննադատել ԱԳՆ աշխատանքը կամ մի քանի անգամ դիրքեր գնալով, լուսանկարվելով զինվորների հետ՝ իրենց ինքնափիարով են զբաղված»:
Վազգեն Սիսլյանը նշեց, որ Արշակ Զարքարյանն իր ընկերն է, և նա ինչքան էլ սուր է խոսել, քննադատել է, երբեք չի քննադատել պետությանն ընդհանրապես, խոսքը անձերին և որոշ նախարարություններին է վերաբերում:
«Եկեք զինվորներին հարցնենք, թե Արշակն ինչքան օգուտ, ինչքան հոգի ու վստահություն է տալիս սահմանին կանգնած հայ զինվորին»,- նշեց Վ. Սիսլյանը:
Նրա խոսքով՝ մեր դիվանագետների մեծ մասը կարծում է, որ եթե իրենք ինչ-որ պաշտոն ունեն, ուրեմն կարող են ամեն մարդու ինչպես ուզեն վիրավորեն և իրենցից ճիշտը չկա. «Ո՛չ, սխալ է, պետականություն հասկացողությունը պետք է ունենա առաջին հերթին պետական այրը: Տիգրանի նման մարդիկ դժբախտաբար շատ-շատ կան: Նրանք պետք է հասկանան, որ ժողովրդի ծառան են, իրավունք չունեն ճնշել ժողովրդին, մանավանդ Արշակ Զաքարյանի նման մարդկանց»:
«Ես ինքս էլ կարող եմ հաստատել, որ մեր ԱԳՆ չի աշխատում, շատ անելիք ունի, բայց չի անում,- նշեց Վ. Սիսլյանը: – Գուցե իրենք իրենց КГБ-ի տեղ են դրել և մտածում են, որ ամեն ինչը պետք է թաքնված լինի, դիվանագիտությունն ունի վարագույրի հետևի աշխատանքներ, բայց այդ աշխատանքը պիտի երևա, թե ԱԳՆ-ն ինչ է անում ընդհանրապես… Ես Էդվարդ Նալբանդյանին միայն բանկետներում եմ տեսնում՝ հեռուստատեսությամբ, դա աշխատանք չէ»:
Մանրամասները՝ տեսանյութում:
