«Քաղաքական ուժերը կամ քաղաքական գործիչները, պատկերավոր ասած, նման են մարդկանց, ովքեր ցանկանում են ընդունվել աշխատանքի, և այս պարագայում գործատուն ոչ թե ինչ-որ կազմակերպություն է, այլ ժողովուրդն է:
Եվ երբ որ քաղաքական գործիչը կամ քաղաքական ուժը բերում է իր ռեզյումեն, եթե նայում ես և տեսնում, որ այնտեղ ձախողումների պատմությունն ավելի շատ է, քան հաջողությունների, եթե տեսնում ես խոստումների և կատարվածի անհամապատասխանությունը չափազանց մեծ է, եթե տեսնում ես, որ այդ քաղաքական ռեզյումեն չի համապատասխանում այն նպատակներին ու այն գործունեությանը, որ դու ունես՝ որպես քաղաքական ուժ, բնականաբար տվյալ քաղաքական ուժերի հետ համագործակցությունը կդառնա ինքնանպատակ:
Հենց այս տրամաբնությամբ էլ մենք առաջնորդվելու ենք: Եթե տեսնենք, որ կան հակասություններ մեր պատկերացումների մեջ, ինքնանպատակ կլինի մեր համգործակցությունը»,- «Առաջին լրատվական»- ի հետ զրույցում այս մասին ասաց «Լուսավոր Հայաստան» կուսակցության քաղաքական խորհրդի և «Ելք» դաշինքի անդամ Հայկ Կոնջորյանը՝ հավելելով, որ այն քաղաքական ուժը, որն ուզում է «աշխատանքի ընդունվել» ժողովրդի մոտ, պետք է նրա տեսակետները համապատասխանեն այն չափանիշներին, որը ժողովուրդն է դնում պետության կառուցման իր հեռանկարում:
Հ. Կոնջորյանի խոսքով՝ Հայաստանում գոյություն ունի միֆ, որ եթե բոլորս միավորվենք, լավ կլինի. «Սակայն այդպես չէ, որովհետև կարող են բոլորով միավորվել և գնալ պարտվել, եթե միավորման տրամաբանությունը հստակ ֆիքսված չէ և իրականում այլ կերպ է դրսևորվում, բայց խորքային մակարդակում այլ առաջնահերթություններ կան»:
Հ. Կոնջորյանը, այնուամենայնիվ, չբացառեց, որ հետընտրական շրջանում հնարավոր են տարբեր ուժերի հետ միավորումները: «Բայց դրանք պետք է միտված լինեն կոնկրետ նպատակների, որոնք բխում են «Ելք»-ի հիմնարար գաղափարներից և պետք է խնդիր ունենան Հայաստանում իրավիճակ փոխելու ոչ միայն ձևի, այլ նաև բովանդակության առումով»:
Մանրամասները՝ տեսանյութում:
