«Առաջին լրատվական»-ի զրուցակիցն է քաղաքագետ Գագիկ Համբարյանը։
– Հովիկ Աբրահամյան-Սերժ Սարգսյան «հակամարտությանը» ի՞նչ գնահատական կտաք։ Նախընտրական շրջանում ՀՀԿ-ի ներսում նման խմորումներն ինչո՞վ են պայմանավորված։
– Ես չէի ասի, թե դրանք խմորումներ են։ ՀՀԿ-ն պարզապես փորձում է ազատվել օդիոզ ֆիգուրներից, որոնցից մեկը Հովիկ Աբրահամյանն էր։ Հանրապետականը փորձում է հասարակությանը ներկայանալ որպես թարմացված քաղաքական ուժ։ ՀՀԿ-ի ներսում կան այլ գործիչներ ևս, որոնցից ձերբազատումը օգուտ է նույն Հանրապետական կուսակցությանը՝ նույն Մհեր Սեդրակյանը, Էջմիածնի գեներալները, Գագիկ Բեգլարյանը և այլոք։ Հիմա ՀՀԿ-ն կփորձի ներկայանալ թարմ և մաքրված քաղաքական ուժով։ Չեմ կարծում, թե Հովիկ Աբրահամյանից ձերբազատվելը շատ մեծ ողբերգություն է Հանրապետական կուսակցության համար։
– Ամեն դեպքում Հովիկ Աբրահամյանն այնտեղ պատահական մարդ չէր, կուսակցության փոխնախագհն էր, երկար տարիներ եղել է ՀՀԿ-ի նախընտրական շտաբի պետը, բազմաթիվ ձայներ է ապահովել ՀՀԿ-ի համար։ Մտավախություն չկա՞, որ այդ պոտենցիալը կօգտագործվի այլ տեղում։
– Ես չէի ասի, թե նա հոյակապ շտաբի պետ է եղել։ Չնայած այն հանգամանքին, որ Հանրապետական կուսակցությունը իր հաջողությունը գրանցել է, բայց բոլորը գիտեն, թե դա ինչ մեթոդներով է եղել՝ ԿԸՀ-ում նկարված թվեր են եղել։ Բոլոր ընտրություններն անցել են մեծ սկանդալներով, բազմաթիվ ընտրախախտումներ ու կեղծիքներ են եղել։ Հովիկ Աբրահամյանը խարիզմատիկ ֆիգուր է եղել ՀՀԿ-ում, ունեցել է իր թիմը, բավականին մեծ կապիտալ է կուտակել՝ շնորհիվ ՀՀԿ անդամ լինելու։ Ես չէի ասի, որ որևիցե այլ կուսակցություն նրա մուտք գործելը մեծ օգուտ կբերի այդ կուսակցությանը։ Կան այնպիսի գործիչներ, որոնց հետ համագործակցելը մեծ վնաս կտա տվյալ քաղաքական ուժին։ Եվ Հովիկ Աբրահամյանը հենց այդպիսի գործիչ է։
– Փաստորեն, հիմա նրա տեղը ՀՀԿ-ի ներսում կզբաղեցնի Կարեն Կարապետյանը։ Չե՞ք կարծում, որ Սերժ Սարգսյանը նաև նրա առումով պետք է մտավախություն ունենա, չէ՞ որ դեռ հայտնի չէ, թե ով է պաշտոնավարելու 2018-ից հետո։
– Կարեն Կարապետյանը նույն գետը հենց այնպես երկու անգամ չէր մտնի։ Նա մի անգամ արդեն բավականին բարձր պաշտոն զբաղեցրել է, եղել է Երևանի քաղաքապետը և ըստ ասեկոսեների՝ բավականին մեծ սկանդալով է հեռացել։ Կարեն Կարապետյանը հիմա բավականին մեծ քարտ-բլանշ պետք է ստանար, որպեսզի ստանձներ Հայաստանի նման երկրի վարչապետի պաշտոնը։ Թե ինչ քարտ-բլանշի մասին է խոսքը, չեմ մանրամասնի։ Բայց այն, որ նա անցել է ՀՀԿ-ի մաքրման գործընթացին՝ դա փաստ է։ Նա փաստորեն ձերբազատվեց այնպիսի քրեական դեմքից, ինչպիսին է Սուրիկ Խաչատրյանը, հետագայում՝ Հովիկ Աբրահամյանից։ Կոճակ սեղմող բազմաթիվ այլ պատգամավորներ կան։ Այնպիսի տպավորություն է, որ դա Ազգային ժողով չէ, այլ ակվարիում է և նրանք եկել են, որպեսզի կոճակ սեղմեն։ ՀՀԿ-ն պետք է ձերբազատվի նրանցից։ Այն, որ Կարեն Կարապետյանը կուժեղացնի իր թիմը ներսում՝ փաստ է։ ՀՀԿ-ն ակումբ է, որտեղ կան բազմաթիվ բևեռներ, այդ բևեռներից մեկը հենց նախկին վարչապետ Հովիկ Աբրահամյանինն էր։ Կա նաև Անդրանիկ Մարգարյանի թիմ, գործարարների թիմ, հենց Սերժ Սարգսյանի թիմ։ Կարեն Կարապետյանը կանի ամեն ինչ իր բևեռն ամրապնդելու համար։ Պետք է նշեմ, որ Սերժ Սարգսյանի իշխանությանը մոտ մեկ տարի ոչինչ չի սպառնում, եթե չլինեն ֆորս-մաժորներ։
