Ադրբեջանական Turan լրատվական գործակալության փոխանցմամբ՝ Ադրբեջանը «Միջազգային թափանցիկություն» կազմակերպության Կոռուպցիայի ընկալման ինդեքսում 30 միավորով 176 երկրների թվում զբաղեցրել է 123-րդ տեղը։
Հետազոտությունում նշված է, որ 2016 թվականին Ադրբեջանը վերացրել է մի շարք խոչընդոտներ՝ ձեռնարկատիրական գործունեության համար՝ ներառյալ կոռուպցիայի համար հիմք ստեղծող խնդիրները։
Դրա հետ մեկտեղ նշված է, որ դեռ լուծված չեն մի շարք խնդիրներ։ Եկամուտների մասին հռչակագրի բացակայության պատճառով չի կատարվում ֆինանսական բնույթի տեղեկությունների մասին օրենքի պահանջը։
Ընդգծվում է, որ թեև շահերի կոնֆլիկտի մասին օրինագիծը մշակված է, սակայն այն դեռ ընդունված չէ։ Բիզնես միջավայրի վրա բացասաբար է ազդում նաև կոմերցիոն իրավաբանական անձանց հիմնադիրների մասին տեղեկությունների տրամադրումը։
