ՀՀ կառավարության նիստերի դահլիճում այսօր՝ հունվարի 21-ին, մեկնարկել է «Ելք» դաշինքի անդրանիկ համաժողովը: «Ելք» դաշինքի առաջին համաժողովին առաջինը ելույթ ունեցավ դաշինքի մաս կազմած Հանրապետություն կուսակցության նախագահ Արամ Սարգսյանը, ով ներկաներին փոխանցեց իր մոր, Գրետա մայրիկի օրհնությունը:
«21-րդ դարասկզբին ձևավորվելու է հայի մի տեսակ, որն իր ազգային գաղափարախոսության կրողն է լինելու, զերծ՝ թերարժեքության մտավախությունից, համարձակ, թիկունքին արժանապատիվ պատմություն, առջևում՝ տարածություն, հայտարարեց Արամ Սարգսյանը: -Մենք այլևս ժամանակ ու տարածություն չունենք, մեզ պետք է ինքնիշխան, զարգացող ու արժանապատիվ Հայաստան»:
«Սովորաբար ասում են՝ պատմությունը կրկնվում է, բայց ոչ մի կրկնություն ամբողջական չէ: Եթե փոփոխությունը ծանրակշիռ է, փոխվում է պատմությունը: Մենք ուզում ենք փոխել պատմությունը՝ ելք տալ: Այս ընտրություններում մենք չենք կրկնելու այն, ինչ պիտի չանեինք, անելու ենք այն, ինչ չենք արել մինչև հիմա»,- հայտարարեց Արամ Սարգսյանը: Նրա խոսքով՝ այս ընտրությունները բնույթով ու ձևով բացարձակ նոր են, չփորձարկված, և ոչ ոք չի կարող համոզիչ, իրատեսական ու վերջնական կանխատեսել, թե ինչ ընթացք կունենան դրանք, ով ինչ արդյունք կգրանցի:
Սարգսյանը նշեց, որ այս իշխանությունը փող է բաժանում, որ գա իշխանության գալիս է իշխանության, որպեսզի փող ստանա. «Եվ իրենք այնքան են ինքնավստահ փողի տարբերակի և նոր ընտրակարգի վրա, որ համաձայնել են ընտրությունների վերահսկման՝ ընդդիմության առաջարկած տարբերակին, այդ թվում՝ տեսանկարահանումները և մասնակիցների ցուցակների հրապարակումը: Իշխանությունն այս ընտրակարգով հույսը դրել է իր գործունեության հետևանքով աղքատության շեմին հասցված ընտրողների ձայնը առնելու վրա»:
«ՀՀԿ-ն ասելու է՝ ամեն ինչ լավ է, իրեն ընտրելու դեպքում ավելի լավ է լինելու ու փող են բաժանելու: Ոչ իշխանություններն ասելու են՝ վատը ՀՀԿ-ն է և Սերժ Սարգսյանի շրջապատը, և նորից փող են բաժանելու: Կան նաև ուժեր, որ կասեն՝ երկրի վիճակն աննկարագրելի վատ է, իշխանությունը դավաճան է, բայց այդ ուժերը մեկ տարի կամ մի քանի օր առաջ են դուրս եկել Բաղրամյան 26-ի շքամուտքից, իսկ հետնամուտքից ելումուտ են անում»,- ասաց նա:
Արամ Սարգյսնաի խոսքով՝ այս բոլոր ուժերն ունեն մեկ ընդհանրություն՝ Հայաստանի ինքնիշխանությունն ու անկախությունը սիրով ու անմոռաց նվիրել են Ռուսաստանին և մեր երկրի ներկան ու ապագան տեսնում են Բելառուսի, Ղազախստանի շրջապատում ու մոդելով: Անգամ որոշ կուսակցապետեր Արցախի հարցի լուծումն առաջարկում են Լավրովյան պլան կոչվածով, միայն թե Մոսկվային ցույց տան, որ իրենք ավելի լավ կծառայեն նրան, քան իշխանությունը:
«Նայելով այս ուժերին՝ ակնհայտ ու պարզ է դառնում, որ ելքը մենք ենք: Ելքն է այն ուժը, որ ազատ, անկաշկանդ ու ոչ ձևական է քննարկում իշխանություններին, որ գաղափարին ու նպատակին նվիրվելն ապացուցել է տարիների զրկանքով, բանտերով: Այս պայքարում ամենակարևորը սեփական ուժերին հավատալն ու ապավինելն է: Հաղթում է ոչ թե նա, ով հարուստ է ու մեծ ռեսուրսներ ունի, այլ նա, ով ոգով է ուժեղ»,- ասաց Արամ Սարգսյանը:
«Ելքը» հակված է անցնցում, առանց ընդհարումների փոփոխությանւ… Ելքը բոլորիս «մենք» դառնալն է ու «մենք»-ի հաղթանակը: Աստված օգնի և բարի երթ»,- եզրափակեց Ա. Սարգսյանը:
Մանրամասները՝ տեսանյութում:
