Samsung Electronics կորպորացիայի նախագահի որդի Լի Չժե Յոնի հարցաքննությունը՝ կապված կոռուպցիոն սկանդալի հետ, տևել է 22 ժամ։ Չժե Յոնը փաստացի մի քանի տարի կատարում է ընկերության ղեկավարի պարտականությունները՝ հոր հիվանդության պատճառով։ Այս մասին հայտնում է «Ռենհապ» գործակալությունը։
Հարցաքննությունը սկսվել է հինգշաբթի առավոտյան և ավարտվել ուրբաթ առավոտյան։ Ավելի վաղ հաղորդվել էր, որ Լի Չժե Յոնը հարցաքննության էր կանչվել հատուկ հանձնաժողով, որը զբաղվում է երկրի նախագահի մասնակցությամբ (որպես կասկածյալ) կոռուպցիոն գործի հետաքննությամբ։ Քննիչները դեռևս որոշում չեն ընդունել Լի Չժե Յոնի ձերբակալման վերաբերյալ։
Ինչպես գործակալությանը հայտնել է քննությանը մոտ աղբյուրը՝ Լի Չժե Յոնը հարցաքննությանը հայտարարել է, որ նախագահ Պակ Կին Հեն ստիպել է իր ընկերությանը միջոցներ հատկացնել կազմակերպություններին, որոնք կապված են իր ընկերուհու և սկանդալի գլխավոր անձի հետ։
Քննությունը կարծում է, որ Samsung Electronics-ը նախագահի ընկերուհու կողմից ղեկավարվող ընկերության (գտնվում է Գերմանիայում) հաշվին փոխանցել է մոտ 18 մլն դոլար՝ իբրև խորհրդատվական ծառայությունների համար, սակայն իրականում այդ միջոցներն ուղղվել են ձիերի ձեռքբերմանն ու նրա դուստրերի ուսուցմանը։ Բացի այդ, կորպորացիան մոտ 17 մլն դոլար է տրամադրել երկու ոչ կառավարական հիմնադրամների, որոնք կառավարել է Ցոյ Սուն Սիլը։
