ԱՄՆ և Ճապոնիայի երկրաբանները պարզել են Չինաստանում Հուանհե դելտայի աղետալի հեղեղման պատճառները: Հետազոտողներն առաջին անգամ հեղեղումը կապել են մարդու գյուղատնտեսական գործունեության և ձկնային տնտեսությունների համար ջրատարներից ջուրը դուրս մղելու հետ: Այս մասին հաղորդում է Nature News-ը՝ վկայակոչելով Geophysical Research Letters-ում գիտնականների հրապարակած հոդվածը:
ԱՄՆ-ում Կոլորադո համալսարանի մասնագետները և Ճապոնիայի Երկրաբանական ծառայությունը վերլուծել են Envisat արբանյակի հավաքած տվյալները 2007-2011թթ.: Ուսումնասիրելով ռադարային չափումների արխիվը՝ երկրաբանները պարզել են, որ տեղ-տեղ մակերևույթի մակարդակն իջել է տարեկան 25 սմ:
Գիտնականներն ընդգծում են, որ սովորաբար ռադարային չափումների համար անհրաժեշտ է որևէ հարթ ու ամուր մակերևույթ, և երկար ժամանակ այն անպիտան էր համարվում գետի դելտաների մոնիթորինգի համար: Հուանհեյի դելտայի շրջանում ձկնային տնտեսությունների զարգացումը հանգեցրել է հարթ տանիքների կառույցների շինարարությանը, և այդ տանիքները բավականաչափ մակերես են զբաղեցրել ռադարային ազդանշանը արտացոլելու համար:
Ափի «նստելու» գործընթացը կապել են ինչպես ջրի մղման, այնպես էլ նավթարդյունահանման հետ: Սակայն նոր հետազոտությունը ցույց է տվել, որ նավթի արդյունահանումը շատ ավելի քիչ դեր ունի այս հարցում:
