«Առաջին լրատվական»-ի զրուցակիցն է Վանաձորի քաղաքապետ Մամիկոն Ասլանյանը:
– Պարոն Ասլանյան, «Լուսավոր Հայաստան» կուսակցության նախաձեռնությամբ կառավարությանն է ներկայացվել Վանաձորի ավագանին լուծարելու և նոր ընտրություն կազմակերպելու նախաձեռնությունը…
– Դիմել են կառավարություն, կառավարությունը կպատասխանի: Եթե ինձ հարցնեիք մինչև կառավարություն դիմելը, գուցե պատասխանեի, բայց որ արդեն դիմել են՝ կառավարությունը կպատասխանի:
– Ինչո՞ւ չեք հրաժարվում Ձեր պաշտոնից: Արդյունքում նոր ընտրություններ կհայտարարվեին:
– Ես որևէ կերպ չեմ կարող նպաստել և ոչ էլ խուսափել, և ոչ էլ իմ գործողությունները կարող են որևէ բանի խոչընդոտ հանդիսանալ: Դա ես չեմ որոշում: Նոր ընտրությունները օրենսդրությամբ են նախատեսված, դա որոշում է կառավարությունը:
– Իսկ եթե Դուք հրաժարական տայիք… նոր ընտրություններ կհայտարարվեին: Ավագանու որևէ նիստ չի գումարվել երեք ամիս:
– Եվ ի՞նչ, ըստ Ձեզ՝ դա ի՞նչ հանգուցալուծում է: Ավագանին գործում է, ուղղակի ավագանու մի հատվածը գործի չի գալիս: Թե չէ՝ ավագանին գործում է, ո՞վ է ասել, որ չի գործում:
– Որևէ քվորում չի ապահովվում, քաղաքի բյուջեն չի հաստատվել:
– Քվորումը նիստերի համար է, բայց ավագանին միայն նիստ գումարելու համար չի: Ամեն ինչ քաղաքապետի լիազորությունների տիրույթում ընթացել է նորմալ, մի անհանգստացեք:
– Չե՞ք անհանգստանում քաղաքի կաթվածահար վիճակի համար:
– Իսկ ի՞նչ վիճակ է քաղաքում: Կարծո՞ւմ եք՝ ավագանին որ չի գալիս նիստերի, քաղաքի իրավիճակի վրա խիստ ազդո՞ւմ է: Ենթադրենք, նիստը չի կայանում, քաղաքի ընդհանուր վիճակի վրա ինչքանո՞վ է ազդում, քաղաքի տնտեսության մեջ, ընդհանրապես մեր աշխատանքները մենք բնականոն հունով կատարում ենք: Չեմ կարծում, թե 18 հոգու ինչ-որ նիստերի դահլիճ չգալը քաղաքի ֆոնի վրա ազդեցություն ունի: Չունի, մի՛ անհանգստացեք, քաղաքը իր բնականոն կյանքով ապրում է, ամեն մարդ իր հոգսով, իր աշխատանքով ապրում է, քաղաքում որևէ բան խաթարված չէ, որևէ աժիոտաժ, որևէ բացասական երևույթ չկա: Սովորական, նորմալ, մարդիկ բնականոն հունով ապրում են:
– Անգամ բյուջեն հաստատված չէ:
– Բյուջեն հաստատված չէ, գործում ենք նախորդ տարվա բյուջեի համամասնությամբ, օրենքը հանգիստ թույլ է տալիս: Այնպես որ՝ անհանգստության որևէ նշան չկա: Սրանք քաղաքական գործընթացներ են, կավարտվեն, ամեն մարդ իր կյանքում և ավագանիում կգտնի իր տեղը:
– Եթե ընտրություններ հայտարարվեն, ի՞նչ արդյունք կգրանցեք:
– Ժողովուրդը կասի իր խոսքը, ես այն ժամանակ էլ չեմ ասել: Ես որևէ անգամ չեմ ասել, որ ես ամենաշատ ձայնն եմ հավաքելու, բայց եղել է այն, ինչ եղել է:
– Չե՞ք ցանկանա, որ ՀՀԿ-ն գոնե մեկ անգամ նորմալ ընտրություն կազմակերպի:
– Ամեն ինչ կազմակերպվել է օրենքի տառին համապատասխան, և Վանաձորը փորձադաշտ չէ, որ անընդհատ ընտրություններ կազմակերպվեն: Մեկ ամսում երկու ընտրություն է կազմակերպվել, ի՞նչ է, վանաձորցին այլ զբաղմունք չունի՞, որ անընդհատ ընտրական գործընթացի մեջ լինի: Ի վերջո, մարդիկ էլ են հոգնում, չէ՞, ընտրություններից, քարոզարշավներից, սուտ խոստումներից. խոստացել էին ծառայել Վանաձորին, բա ո՞ւր են այդ ծառայողները հիմա:
– Ձեր ինքնասիրությունը չի՞ վիրավորվում, որ ավագանու այդքան անդամ չի գալիս նիստերին, բոյկոտում է:
– Ձեզ վստահեցնում եմ, որ իմ ինքնասիրությունը չի կարող որևէ մեկը վիրավորել և անպատիժ մնալ: Իրենք իրենց ժողովրդի առաջ պետք է ամաչեն, իսկ ինձ չեն կարող վիրավորել նիստերին չգալով: Հո մեր տո՞ւն չեմ հրավիրել, որ արհամարհեն, չգան: Իրենք՝ իրենց գործառույթը, կուզեն՝ կգան, կուզեն՝ չեն գա: Օրենքը յուրաքանչյուր տարբերակի համար ունի իր նախատեսած դրույթը: Դրա համար իրենց կամքն է, իրենց դրսևորումն է: Ինձ այդքան հեշտ չէ վիրավորելը, և ոչ էլ վիրավորանքը ես կուլ տվող եմ:
– Եթե կառավարությունը նոր ընտրություններ չհայտարարի Վանաձորում, Դուք որևէ քայլ չե՞ք պատրաստվում ձեռնարկել:
– Ինչ իմ քաղաքի համար դրական ազդեցություն կունենա, ես բոլոր քայլերը ձեռնարկում եմ և ձեռնարկելու եմ հանուն քաղաքի: Ես հանուն Վանաձորի ապագայի և հանուն վանաձորցու եմ դարձել քաղաքապետ և ոչ թե քաղաքական թատերաբեմում դերակատարում ունենալու համար: Ես վաղուց ապրում եմ վանաձորցու հոգսով՝ առավոտից երեկո, կարելի է ասել՝ մինչև ուշ գիշեր: Այնպես որ՝ ինձ համար օրվա խնդիրը Վանաձորն է, ոչ թե Վանաձորից դուրս տեղի ունեցող իրադարձությունները:
– Պարոն Ասլանյան, ի՞նչն է պատճառը, որ այդքան կառչած եք այս աթոռից:
– Իսկ ձեզ չի՞ թվում, որ ես աթոռի համար երբեք կռիվ չեմ տվել:
– Ստեղծված իրավիճակն ի՞նչ է:
– Ես օրենքով սահմանված իմ լիազորություններն եմ իրականացնում, իմ ընտրությունը որևէ կասկած չի կարող հարուցել: Այնպես որ՝ հանգիստ մնացեք և աթոռի համար պայքարում մեղադրեք այլ անձանց: Ես աթոռի համար չեմ պայքարել և ընտրվել եմ օրինական ճանապարհով: Որևէ մեկը, այդ թվում՝ մեր ընդդիմադիրները, չեն կարող դա հերքել:
– Ընդդիմադիրներն ասում են, որ զոռբայությամբ եք այդ պաշտոնը զբաղեցրել:
– Գիտեք ինչ կա, սխալ են անում, որ ասում են: Ես այդ մակարդակի չեմ իջնի, այդ բառերն իմ լեքսիկոնում չկան, որ ես օգտագործեմ: