ՀՀ պաշտպանության նախարարությունն ամփոփել է զինված ուժերում մարդու իրավունքների պաշտպանության ապահովման ուղղությամբ կատարված աշխատանքները: Քննարկման մեկնարկին ՀՀ պաշտպանության նախարար Վիգեն Սարգսյանն իր խոսքում կարևորեց զինված ուժերում մարդու իրավունքների պաշտպանության ապահովման հարցում Օմբուդսմենի հետ աշխատանքը: «Մեր կարևոր գործառույթներից է բանակում մարդու իրավունքների պաշտպաքնության ապահովումը, և այդ հարցում մարդու իրավունքների պաշտպանի գրասենյակի հետ աշխատանքը տալիս է իր արդյունքը»,- նշել է նախարարը` շնորհակալություն հայտնելով բոլոր այն անձանց, ովքեր աջակցել են նախարարությանը բանակում մարդու իրավունքների պաշտպանության ոլորտում խնդիրները վեր հանելու և դրանց լուծման ուղղությամբ քայլեր ձեռնարկելու հարցում:
ՀՀ մարդու իրավունքների պաշտպան Արման Թաթոյանն էլ ընդգծեց, որ զինված ուժերում մարդու իրավունքների պաշտպանության ապահովման ուղղությամբ պահանջվում է մասնագիտական սկզբունքներին համապատասխան սրտացավ աշխատանք: «Հենց դրա համար էլ նախարարությունում ստեղծվել է զինծառայողների իրավունքների պաշտպանության մասնագիտացված ստորաբաժանում, ինչի արդյունքում զինծառայողների առողջական վիճակի, բժշկական փորձաքննության, սոցիալական իրավունքների հետ կապված անհատական բողոքների հիման վրա կարողանում ենք համակարգային հարցեր վեր հանել»,- ասաց Թաթոյանը։
Օմբուդսմենը խոսել է նաև միջազգային կառույցների հետ համագործակցության անհրաժեշտություն մասին` ընդգծելով, որ հարկավոր է ուսումնասիրել միջազգային փորձը, հասկանալ, թե ինչպես են այլ երկրներում լուծվում զինված ուժերում մարդու իրավունքների պաշտպանության հետ կապված խնդիրները: Արման Թաթոյանը հայտնել է, որ ՄԻՊ գրասենյակում ստեղծվել է զինծառայողների իրավունքների հարցերով փորձագիտական խորհուրդ: Նա նաև ասաց, որ գրասենյակը պատրաստակամ է զինծառայողների իրավունքների յուրաքանչյուր խախտման նկատմամբ բացարձակ անհանդուրժողականություն ցուցաբերելու հարցում։
ՀՀ պաշտպանության նախարար Վիգեն Սարգսյանը կարևորեց խորհրդի ստեղծումը և նշեց, որ մարդու իրավունքների պաշտպանության ոլորտը երկու հատկություն ունի, առաջինը՝ սիստեմատիկ խախտումների միջավայրի փոփոխությունն է, որ կրկնվող խախտումներ չլինեն և երկրորդը՝ քաղաքացիական հասարակության և բանակի միջև մշտական կապի ապահովումը:
«Առաջին շահագրգիռ մարմինը պաշտպանության նախարարությունն է, որ քաղաքացին զինված ուժերում իրեն զգա ամուր և պաշտպանված, քանի որ միայն այդ դեպքում քաղաքացին կարող է արդյունավետ պաշտպանել իր երկիրը»,-հավելեց նախարարը:
