Վրաստանի նախագահ Միխեիլ Սաակաշվիլին վետո է դրել բարձրագույն կրթության մասին օրենքում փոփոխությունների օրինագծի վրա, հաղորդում է Trend-ը:
Նշենք, որ օգոստոսի 6-ին Վրաստանի խորհրդարանը հաստատել է այդ փոփոխությունները:
Նախագահի վարչակազմը հայտարարել է, որ Սաակաշվիլին նախազգուշացրել էր, թե պատրաստվում է վետո դնել այդ օրինագծի վրա: Նա կարծում է, որ այդ փոփոխությունները լուրջ խնդիրներ կառաջացնեն կրթական համակարգում:
Համաձայն օրենքի նախնական տարբերակի՝ բուհի ռեկտորին պետք է նշանակի վարչապետը և նա պետք է իրականացնի ռեկտորի գործառույթները մինչև բուհի ակադեմիական խորհուրդը նոր ռեկտոր ընտրի: Դրան դեմ են դուրս եկել «Միացյալ ազգային շարժում» կուսակցության անդամները, բուհերի պրոֆեսորները և ուսանողները, ինչպես նաև «Վրացական երազանքի» մի շարք անդամներ:
Ըստ խորհրդարանի ընդունած օրինագծի՝ ռեկտորի պարտականություններ կատարող անձին պետք է ընտրի նախընտրական կոլեգիան: Դրա մեջ մտնում են բուհում ակադեմիական կամ գիտական պաշտոններ զբաղեցնող անձինք, ովքեր ունեն դոկտորի կամ այլ գիտական աստիճան:
