ՀՀ զինվորական դատախազության նախաձեռնությամբ ստեղծված աշխատանքային խումբը, որը պետք է ուսումնասիրի ՀՀ զինված ուժերում արձանագրված մահվան ելքով քրեական գործերը, որոնցով ամփոփիչ որոշումները կայացվել են 2011թ. հունվարի 1-ից հետո, զոհված զինվորների մայրերի մեջ հավատ չի ներշնչում:
Կառավարության շենքի մոտ այսօր զոհված զինվորների մայրերը «Առաջին լրատվական»-ի հետ զրույցում նշեցին, որ աշխատանքային խումբը զինվորական գործերը կտանի փակուղի:
«Բացարձակապես հավատ չի ներշնչում: Բացի դրանից՝ թե՛ իմ որդու, թե՛ էլի շատուշատ գործեր չեն մտնում այդ հանձնաժողովի քննության տարիների մեջ: Մենք զինդատախազի տեղակալի մետ ենք եղել, որը մեզ առաջարկում էր գրել դիմում, խնդրել, որ մեր գործերն էլ ներառեն այս հանձնաժողովում»,- ասաց 2001-ին զոհված զինծառայող Արայիկ Ավետիսյանի մայրը՝ Անահիտ Մկրտչյանը, հավելելով, որ չի վստահում այս կառույցին, քանի որ տեսնում է՝ ինչ կազմակերպություններ են ներգրավված:
Նա նշեց, որ աշխատանքային խմբիաշխատանքին հրաժարվել են մասնակցել Հելսինկյան ասոցիացիայի երևանյան գրասենյակը, մարդու իրավունքների պաշտպանի գրասենյակը և այլն: Նրա խոսքով՝ զինդատախազության կեղծիքը փորձում են ՀԿ-ների միջոցով ամրագրել:
«Հիմա արդեն համոզված ասում եմ, որ չենք պայքարելու, քանի որ վստահություն չունենք, որ այնտեղ որևէ դրական լուծում կստանան գործերը»,- ասաց նա:
Ըստ նրանց՝ զինդատախազությունն այս քայլով ուզում է ասել, որ ևս մեկ անգամ ամեն ինչ արեց, բայց տեսաք, որ իրենք ճիշտ էին:
Զոհված զինծառայող Արթուր Ղազարյանի ծնողներից Իրինա Ղազարյանը նույնպես չի հավատում աշխատանքային խմբի արդյունավետությանը: «Տղայիս հետ եղել են ևս ութ զինվոր, բայց չգիտեմ, որևէ մեկին ձեռք չի տալիս, որ դա բացահայտեն»,- ասաց նա:
Նա նշեց, որ որդու գործը կարճել են, իբր, հանցակազմի բացակայության պատճառով:
Բացի դրանից՝ իրենց դատախազությունից տեղեկացրել են, որ աշխատանքային խմբի որոշումները որևէ իրավական ուժ չեն ունենալու:
Գոհար Սարգսյանը՝ զոհված զինվոր Տիգրան Օհանջանյանի մայրը, չի կարծում, թե սա իրական աշխատանքային խումբ է: «ՀՀ զինվորական դատախազի տեղակալ Արտակ Հարությունյանը մեզ հետ հանդիպմանը նշեց, որ իրենք երեք հոգի են լինելու, իսկ խմբի մեջ ներգրավված են չորս կազմակերպություններ ՀԿ-ներից, որոնք կազմում են մեծամասնություն, և ինչ-որ հարց քննարկելիս պետք է դնեն քվեարկելու: Այստեղ իրենք մեզ ուզում են ներգրավել, որ մեր երեխաների գործերը փակուղի տանեն»,- հավելեց Գոհար Սարգսյանը: