Դեկտոմբերի 14-ին Ստոկհոլմի շրջանային դատարանը վճիռ է կայացրել Շվեդիայի թուրքական կազմակերպությունների համադրող կենտրոնի նախկին փոխնախագահ Բարբարոս Լեյլանիի գործով, որը ապրիլի 9-ին Շվեդիայի ադրբեջանական, թուրքական եւ թուրքմենական մի շարք համայնքային կազմակերպությունների կողմից Ստոկհոլմի կենտրոնում կազմակերպված ցույցի ժամանակ հանդես էր եկել բացահայտ հայատյաց հայտարարություններով։
Դատարանը վճռել է, որ Լեյլանին կատարել է էթնիկ խմբի դեմ ատելություն սերմանելու հանցագործություն՝ ծանրացուցիչ հանգամանքներով։ Ըստ դատարանի վճռի՝ Լեյլանիի նկատմամբ սահմանվել է պատիժ երկու տարվա պայմանական ազատազրկման և տուգանքի վճարման տեսքով։
Մինչ այդ, նոյեմբերի 30-ին տեղի ունեցած դատական նիստի ժամանակ դատախազն առաջարկել էր Լեյլանիին դատապարտել պայմանական ազատազրկման և նշանակել տուգանք՝ հիմնավորելով, որ հայտարարությունում սպառնալիք է հնչեցվել՝ ուղղված կոնկրետ խմբի դեմ, ինչը տեղի է ունեցել Ստոկհոլմի կենտրոնում։
Դատապաշտպանն առաջարկել էր սահմանափակվել տուգանքով՝ հիմնավորելով, որ մեղադրյալը գտնվել է անկայուն հոգեկան վիճակում, օգտագործել է ուժեղ դեղորայք և ելույթ է ունեցել հանպատրաստից։
Այսպիսով՝ դատարանը որոշել է ամբողջությամբ բավարարել դատախազի պահանջը և Լեյլանիի ազգայնամոլական և հայատյաց վարքագիծը որակել որպես քրեական հանցագործություն։
Հիշեցնենք, որ ապրիլյան պատերազմի օրերին Բարբարոս Լեյլանին Հիշեցնենք, որ Լեյլանին ապրիլյան պատերազմի օրերին Ադրբեջանի կազմակերպած հանրահավաքի ժամանակ հանդես է եկել հակահայ հայտարարություններով՝ բացականչելով «Մա՛հ հայ շներին, մա՛հ, մա՛հ»։
