«Սա այս կառավարության առաջին օրենքն է, որին կողմ եմ, որովհետև սա նաև եղել է դեռևս 2009 թվականի փետրվարին գրված մեր 100 քայլի կետերից մեկը»,-խորհրդարանում ապօրինի հարստացումը քրեականացնելու մասին նախագծի քննարկման ժամանակ նշեց պատգամավոր Հրանտ Բագրատյանը:
«Ես ուզում եմ ձեզ ասել, տիկին Հովհաննիսյան, որ սա դեռ հարցի լուծում չէ: Իմ խորին համոզմամբ՝ տնտեսական հարցում ևս երկու քայլ եթե չի արվում, այս օրենքն ընդունած կամ չընդունած միևնույն է:
Առաջին քայլն այն է, որ Արևելյան Եվրոպայի երկրների փորձը ցույց տվեց, հատկապես երբ միլիարդատերը դարձավ Սլովակիայի վարչապետ, և այնուհետև Ուկրաինայի նախագահ դարձավ ևս մեկ միլիարդատեր, նրանց ընկերությունների հավատարմագրային կառավարման խնդիր է ծագում:
Այստեղ հարց է ծագում՝ արդյոք նա կարո՞ղ է կառավարումը հանձնել որդուն, հարազատին, թե՞ պարտավոր է ունեցվածքը հանձնել որևէ մարմնի: Որոշ երկրներ գնացել են այն տարբերակով, որ ստեղծված է մարմին, որ նրա պաշտոնավարման շրջանում այդ չեզոք մարմինն է կառավարում նրա բիզնեսը: Սա քայլ է, թվում է խիստ, բայց դրան են գնում բոլոր երկրները:
Երկրորդ կարևոր դիտողությունը. նման քայլն արդյունք չի բերի, եթե չկա համատարած եկամուտների հայտարարագրում: Եթե մի տեղ դուք եկամուտները հսկեք, մի տեղ՝ ոչ, տեղի կունենա եկամուտների հոսք: Եվ դրանով ամբողջը կավարտվի, մարդն իր վրա չի վերցնի հաշվետվությունը, կտա, ասենք, հորեղբոր տղային կամ էլ ինչ-որ տատիկի: Դրա համար պետք է ունենանք եկամուտների համատարած հայտարարագրում»,- նշեց Հ. Բագրատյանը:
Մանրամասները՝ տեսանյութում:
