Օգոստոսի 11-ի գիշերը Երևանի քաղաքապետարանի հասարակայնության հետ կապի և լրատվության բաժնի աշխատակից Արթուր Սարուխանյանի և քաղաքապետարանի մոտ նստացույց իրականացնող ակտիվիստ Միհրան Մելքոնյանի միջև տեղի ունեցածին ՀՀ ոստիկանությունն արձագանքել է Միհրան Մելքոնյանից ահազանգ ստանալուն պես: Այս մասին «Առաջին լրատվական»-ի հետ զրույցում ասաց ՀՀ ոստիկանության գնդապետ, ոստիկանության լրատվության և հասարակայնության հետ կապերի վարչության պետ Աշոտ Ահարոնյանը:
«Առաջին լրատվական»-ի այն հարցին, թե ճի՞շտ է, որ օգոստոսի 11-ի գիշերը Երևանի քաղաքապետարանի մոտ նույն գերատեսչության աշխատակից Արթուր Սարուխանյանի և նստացույց իրականացնող ակտիվիստ Միհրան Մելքոնյանի միջև տեղի ունեցած միջադեպին ՀՀ ոստիկանությունը պատշաճ կերպով չի արձագանքել, նա պատասխանեց, որ դա իրականությանը չի համապատասխանում: Աշոտ Ահարոնյանի հավաստիացմամբ՝ միջադեպից հետո Միհրան Մելքոնյանն ահազանգել է ՀՀ ոստիկանություն, որից հետո թե՛ նա, թե՛ Երևանի քաղաքապետարանի աշխատակիցը տվել են բացատրություններ:
Ինչ վերաբերում է Միհրան Մելքոնյանի բացատրությանն, Աշոտ Ահարոնյանը բառացիորեն մեջբերեց. «Օգոստոսի տասնմեկին, երբ գտնվում էինք քաղաքապետարանի դիմաց՝ նստացույցի, մի մեքենա եկավ՝ սխալ կայանվեց, մոտեցա, որ նկարեմ, մի տղամարդ իջավ, շարժվեց իմ ուղղությամբ, նա ձեռքով հրեց իմ ձեռքի տեսախցիկը, որից հետո ես զանգահարեցի ոստիկանություն: Ձեր կողմից առաջադրված հարցերին պատասխանում եմ, որ ինձ ոչ ոք չի հարվածել, իմ նկատմամբ բռնություն չի կիրառվել, տեսախցիկս չի վնասվել։ Եվ քանի որ մարմնական վնասվածք չունեմ, անիմաստ եմ համարում և հրաժարվում եմ ենթարկվել դատաբժշկական փորձաքննության։ Նշված դեպքի ժամանակ սեռական բնույթի հայհոյանքներ չեն եղել: Ավելացնելու այլ բան չունեմ»: Ի դեպ, Աշոտ Ահարոնյանը ևս մեկ անգամ հավելեց, որ բացատրությունն ակտիվիստ Միհրան Մելքոնյանը տվել է օգոստոսի 11-ին:
