Այսօր ԱԺ արտահերթ նիստում «Զինծառայողների և նրանց ընտանիքների անդամների սոցիալական ապահովության մասին» Հայաստանի Հանրապետության օրենքում լրացումներ և փոփոխություն կատարելու մասին օրենքի նախագծի քննարկման ժամանակ պաշտպանության նախարար Վիգեն Սարգսյանն անդրադարձավ «Մարտիկ» հիմնադրամի գործունեությանը:
«Անընդհատ բերվում էր «Մարտիկ» հիմնադրամի օրինակը, որն իր գործունեությամբ կարծես թե այնպես է ստվերել այս գաղափարը, որ այլևս անհնար է որևէ մեկին համոզել դրա արդյունավետության մասին: Պետք է ասեմ, որ «Մարտիկ» հիմնադրամի առումով պատկերը բավական մտահոգիչ է, որովհետև երկար տարիների գործունեության ընթացքում այդ հիմնադրամի նվիրատուների թիվը որևէ տարում չի գերազանցել 7000-ը: Նվիրատուների գերակշիռ մասը եղել են զինծառայողներ ու նրանց ընտանիքի անդամներ: Հավաքագրված գումարները բոլոր տարիների ընթացքում կազմել են 1 մլն 200 հազար դոլար գումար: Բոլոր հավաքագրված գումարներն անձեռնմխելի դրված են բանկերում, հիմնադրամի հաշիվներին, և որևէ կոպեկ այդ մայր գումարից չի ծախսվել, ինչպես և նախատեսված է այդ հիմնադրամի կանոնադրությամբ»,- ասաց Վիգեն Սարգսյանը:
Նա հավելեց, որ դրամագլխից ստացված տոկոսներից որոշակի աջակցություն է ցույց տրվել սոցիալապես լուրջ խնդիրներ ունեցող, ինչպես նաև զոհված զինծառայողների ընտանիքներին, հաշմանդամություն ունեցող զինծառայողներին:
«Այդ ծախսերի արդյունավետությունը դժվար է գնահատել, բայց որ դրանք կատարվել են կանոնադրության համապատասխան, դա ակնհայտ երևում է հաշվետվություններից:
Միշտ չէ, որ ակնհայտ թվացող լուծումն ամենաարդյունավետն է… Մենք այլ մոտեցում ենք ընտրել, կարևորելով այս գաղափարը՝ առանձին տողով հնարավորություն ենք ստեղծել յուրաքանչյուր քաղաքացու համար այն կամքը, որն արտահայտվեց ապրիլին, ավելի կենտրոնացված, կազմակերպված ու դրան իրավական ձև հաղորդած՝ պարբերական բնույթ հաղորդել դրան»,- ընդգծեց նախարարը՝ հավելելով, որ ժողովրդի վճարած հարկերով պետությունը բյուջեից այդ աջակցությունը ցուցաբերելու է այս խավին և դա լինելու է պարտադիր վճար:
«Նման նախաձեռնություն բերելով՝ որևէ մեկը չէր կարող ստանալ մեծ աջակցություն, որովհետև որևէ մեկն իրեն չի ուզում դիտարկել այս օրենքի շահառու՝ հասկանալի պատճառով: Որևէ մեկը չի ուզում պատկերացնել, որ այս օրենքը կարող է վերաբերել իրեն: Բայց ամեն մեկը, ով վճարում է այսօր հարկեր, գիտի, որ այս օրենքը դիպչում է նաև իր գրպանին: Հավատացեք, որ ես դա շատ սթափ գնահատել եմ, ես համարել եմ, որ սա իմ՝ որպես պաշտպանության նախարարի, կարևոր գործառույթն է՝ կանգնելու այն մարդանց կողքին, ովքեր, Աստված մի արասցե, վաղը կարող են կանգնել այդ վիճակի առաջ»,- նշեց նախարարը և հորդորեց կողմ քվեարկել նախագծին:
Մանրամասները՝ տեսանյութում:
