ԳԱԼԱ կուսակցությունը չի բացառում դաշինքներով հանդես գալու հավանականությունը. «Ողջունելի է այն հանգամանքը, որ տարբեր քաղաքական ուժեր սկսել են հանդես գալ դաշինքներ կազմելու առաջարկությամբ: «Առաջին լրատվական»- ի հետ զրույցում այս մասին ասաց ԳԱԼԱ կուսակցության նախաձեռնող խմբի անդամ Արմենուհի Վարդանյանը:
Նրա խոսքով՝ ԳԱԼԱն այս շրջանում դեռևս հետևում է իրադարձությունների զարգացմանը, հասկանալու, թե քաղաքական դաշտում ինչ է կատարվում և ինչ հնարավոր զարգացումներ կլինեն, ինչ դաշինքներ կձևավորվեն: Այս հապաղումը պայմանավորված է նաև թերահավատությամբ, քանի որ ՏԻՄ ընտրություններին լայն դաշինքով հանդես գալու համագործակցությունը չստացվեց:
«ՀՀԿ-ի իշխանության տարիներն աղետալի են եղել Գյումրիի համար, իմ քաղաքը դատարկվել է՝ ավելի քան 30 000 քաղաքացի լքել է Գյումրին: Աղքատության մակարդակը բարձրացել է, մեծացել է ծայրահեղ աղքատների թիվը, ամեն առումով հետընթաց ենք ապրել»,- նշեց Ա. Վարդանյանը՝ հավելելով, որ այս ամենը տեսնելով՝ հնարավոր չէ հավատալ ՀՀԿ-ի իմիջափոխությանը:
«Եթե հնարավորություն ունենայի հարց տալ վարչապետին, կհարցնեի՝ արդյո՞ք չեն ամաչում իշխանության ներկայացուցիչները, որ շարունակաբար խաբում են ժողովրդին: Հերթական լուրը ստացանք հերթական վարկի մասին. պարտքի բեռը գնալով ավելանում է. ընդամենը երկուամսյա կառավարությունն արդեն 240 միլիոն դոլարի վարկ է վերցնում»,- նշեց Ա. Վարդանյանը՝ հավելելով, որ միայն իմիտացիոն գործընթացներ են տեղի ունենում, որոնք որևէ դրական փոխության չեն հանգեցրել:
«Ընդամենը կայծ է հարկավոր, որ ժողովուրդը դարձյալ ոտքի կանգնի և իր բողոքի ձայնը և պահանջը ներկայացնի,- նշեց Ա. Վարդանյաը,- եթե ընդդիմությանը հաջողվի ձևավորել լայն կոնսոլիդացիա, հնարավոր է, որ իրավիճակը փոխվի, ինչին, սակայն, թերահավատ եմ մոտենում»:
Մանրամասները՝ տեսանյութում:
