Ավելի քան 800 մարդ է զոհվել, ևս մոտ 3000-3500-ը վնասվածքներ են ստացել վերջին 26 օրերին Հալեպի պաշարված արևելյան շրջաններում։ Այս մասին հայտնում է քաղաքային խորհրդի ղեկավար Բրիտա Հաջի Հասանը՝ փոխանցում է BBC-ն։
«Այսօր 150 հազար մարդ գտնվում է ոչնչացման սպառնալիքի տակ։ Մենք խնդրում ենք դադարեցնել ռմբակոծություններն ու երաշխավորել քաղաքից անվտանգ ելք»,-ասել է նա Ժնևում Սիրիայի հարցով ՄԱԿ-ի հատուկ դեսպանորդ Ստաֆան դե Միստուրայի հետ հանդիպմանը։
Բուժօգնության ցուցաբերման սիրիական կազմակերպությունների միավորման նախագահ Տավֆիկ Չաման հայտնել է, որ Հալեպից հրատապ տարհանման և հոսպիտալացման կարիք ունեն մոտ 1500 հիվանդներ։ Նրա խոսքով՝ տարհանումը պետք է իրականացվի միջազգային դիտորդների վերահսկողության ներքո, որպեսզի կանխվի հավանականությունն առ այն, որ հիվանդները կպատժվեն հոսպիտալի ճանապարհին։
Չորեքշաբթի հայտնի էր դարձել, որ սիրիական կառավարական զորքերին հաջողվել է վերահսկողության տակ վերցնել Հալեպի պատմական կենտրոնի բոլոր շրջանները։ Այժմ Սիրիայի բանակը վերահսկողում է Հալեպի արևելյան մասի տարածքի 75 տոկոսը։
Սիրիացի ապստամբները չորեքշաբթի Հին քաղաքից իրենց ջոկատները դուրս բերելուց հետո 5-օրյա հրադադար էին խնդրել՝ վիրավորներին տարհանելու համար։
