Թուրքիայի պատմության մեջ ամենամեծ քաշով՝ 717 կգ հերոինի խմբաքանակ է առգրավվել: Բեռը հայտնաբերվել է թուրք-բուլղարական սահմանին, հաղորդվում է Թուրքիայի առևտրի և մաքսային նախարարության հայտարարության մեջ: Այս մասին հայտնում է RIA Novosti-ն:
«Արգելված բեռը հայտնաբերվել է «Համզաբեյլի» հսկիչ անցակետում (Թուրքիայի հյուսիս-արևմուտք) բոսնիական համարանիշերով մեքենայի ստուգման ժամանակ, որը վարել է խորվաթ վարորդը: Հերոինը թաքցված է եղել լվացքի մեքենաներում, որոնք տեղափոխել է ավտոմեքենան»,- ասվում է հայտարարության մեջ:
Դրանից անմիջապես հետո թուրք-բուլղարական սահմանի «Կապըկուլե» անցակետում Թուրքիայի իշխանությունները ևս 393 կգ հերոին են առգրավել՝ Թուրքիայից Բուլղարիայի ուղղությամբ շարժվող, հացահատիկով բեռնված փոխադրամիջոցում:
Գործողությունների արդյունքում առգրավված հերոինի ընդհանուր արժեքը, նախարարության տվալներով, կազմել է մոտ 33 մլն դոլար:
Երկու վարորդներից բացի, ձերբակալվել է հանցագործություններին մասնակցություն ունենալու համար կասկածվող 3 անձ:
2012 թվականին Թուրքիայի իշխանություններն անցկացրել են ավելի քան 130 գործողություն, որոնց ընթացքում հայտնաբերվել է մոտ 84 մլն արժեքով ավելի քան 2.3 տոննա զանգվածով թմրանյութ: Ձերբակալվել է 186 մարդ:
