«Հայրենիք ու պատիվ» կուսակցության նախագահ Գառնիկ Մարգարյանի նախաձեռնությամբ շուրջ մեկ տարի գործող «Հակակոռուպցիոն» կազմակերպությունը ստանձնել է կոռումպացված չինովնիկներին բացահայտելու, դատարանի առջև կանգնեցնելու և թալանված գումարները ետ վերադարձնելու գործը: Սակայն ինչպես «Առաջին լրատվական»-ի հետ զրույցում ասաց Գառնիկ Մարգարյանը, կոռուպցիան և կրիմինալը երբեք անջատ չեն լինում, և եթե իրենց չհաջողվի թալանվածների գումարները ետ բերելու գործընթացը, որին կհաջորդեն նաև անկախ Հայաստանի պատմության բոլոր ոճրագործությունների, սպանությունների, սպանդների բացահայտումները, ապա կպատրաստեն նյութեր սպանությունների մասին և կուղարկեն ՄԻ Եվրոպական դատարան` պահանջելով շտապ քննություն, քանի որ յուրաքանչյուր մարդու կյանքի հետ կապված դեպքը ծանրագույն հանցագործություն է` լինի դա միտումնավոր, թե ոչ: Իսկ Հայաստանում, նրա խոսքերով, վերջին տարիների ընթացքում դրանք բազմաթիվ են եղել, թեև այդ բոլոր դեպքերի մեկնարկը տրվեց, երկրում ահ ու սարսափի մթնոլորտ տարածվեց այն ժամանակ, երբ «Պապլավոկում» սպանվեց ԼՂ պատերազմի մասնակից Պողոս Պողոսյանը միայն նրա համար, որ այդ տարիների նախագահին անվանեց «Ռոբ»՝ նրա կարճ անունով:
«Դա մարտահրավեր էր ՀՀ բնակչությանը, սա հերթական մարտահրավերն էր, որ՝ տեսեք, թե ով հանդգնեց խոսել անվամբ, կարժանանա մահապատժի: Իրականում սա խորքային, սարսափելի երևույթ է, որի և՛ իրագործողներն անպատիժ մնացին, և՛ հանձնարարական տվողը` Ռոբերտ Քոչարյանը: Այս դեպքը դարձավ նախադեպային: Ծանրագույն հանցագործություն էր, երբ ԱԺ-ում այդքան մարդ սպանվեց, այն էլ երկրի կարևոր դեմքեր և երկրի առաջին դեմքն ու կառավարությունը հրաժարական չտվեց։ Այս դեպքում նա ոչ միայն չտվեց և պատվիրատուները չհայտնաբերվեցին, նա շարունակեց նախագահել երկրում: Հոկտեմբերի 27-ը մեծ դավադրություն էր հայ ազգի դեմ, որի չբացահայտումը ծանր հետք թողեց հայ մարդու հոգեբանության վրա, կոտրեց հոգին, կոտրեց հայ մարդուն, որը կարող էր կերտել երկիր: Սա փոխեց երկրի և՛ արտաքին, և՛ ներքին քաղաքականությունը: Վերացվեցին մարդիկ, ովքեր կողմնակից էին, որպեսզի Հայաստանը հասներ անկախության ամրագրմանը, ռազմավարական պարտնյորների հետ բարիդրացիական հարաբերությունների, տնտեսական զարգացմանը և, տեսեք, իմ կարծիքով, սա հեռու գնացող քաղաքական հետևանքներ ունեցավ, որ ՀՀ-ն չպետք է լինի զարգացած:
Հոկտեմբերի 27-ի պատվիրատուները չբացահայտվեցին, դրա շարունակությունը Մարտի 1-ի սպանդն էր։ Սպանդ տեղի ունեցավ և նորից չբացահայտվեց, իսկ երկրում մարդու կյանքի ապահովումը դրված էր ոմն Ռոբերտ Քոչարյանի վրա, իսկ նա ի՞նչ արեց՝ գնդակահարեց, որովհետև նա հայ ժողովուրդ չի սիրում և ազգ չի սիրում: Նա ատելությամբ ու չարությամբ է լցված: Այս ամենը բերեց նրան, որ մարդիկ լքում են երկիրը, և պատճառը Ռոբերտ Քոչարյանի պաշտոնավարման տասը տարիներն էին, և այդ տարիներից սկսված բոլոր սպանությունները պետք է բացահայտվեն»,- ասաց Գառնիկ Մարգարյանը:
