Ռուսական RIA Novosti լրատվական գործակալության փոխանցմամբ՝ WikiLeaks պորտալը հրապարակել է Թուրքիայի էներգետիկայի ու բնական պաշարների նախարար Բերաթ Ալբայրաքի էլեկտրոնային նամակները, ով երկրի նախագահ Ռեջեփ Էրդողանի փեսան է։
Ընդհանուր առմամբ հրապարակվել է գրեթե 58.000 ուղերձ, որոնք գրվել են 2016 թվականի ապրիլից մինչև սեպտեմբերն ընկած ժամանակահատվածում։ Դրանց հասցեատերերը հիմնականում քաղաքական գործիչներն են, գործարարները, ազգականները։
WikiLeaks-ն ընդգծել է, որ այդ նամակագրությունն ի ցույց է դնում թուրք նախարարի մեծ ազդեցությունը թուրքական քաղաքականության ու կյանքի բազում ոլորտների վրա։
Նամակները մասնավորապես վկայել են, որ Ալբայրաքը կարող է կապված լինել Powertrans ընկերության հետ։ 2011 թվականին Էրդողան կառավարությունն ընդունել էր օրինագիծ, որն արգելում էր նավթի ու նավթամթերքի ներկրումը, արտահանումը Թուրքիայի տարածք կամ դրանց տարանցումը Թուրքիայով:
Սակայն փաստաթուղթը նախատեսել էր, որ իշխանությունները կարող են հատուկ դեպքերում վերացնել արգելքը, ինչը և տեղի ունեցավ Powertrans-ի հետ, որին տրվեցին առանց բաց վաճաքռի իրականացնել նավթի փոխադրման բացառիկ իրավունքներ։
WikiLeaks-ը, նշել է, որ թուրքական ԶԼՄ-ները քանիցս ենթադրել են, որ Powertrans-ը Թուրքիա է ներկրում ԴԱՒՇ-ի նավթը։ Սակայն Ալբայրաքը հերքել էր Powertrans-ի հետ կապը։
Բացի այդ, մի շարք նամակներ վկայում են թուրքական ԶԼՄ-ներն ու սոցցանցերը վերահսկելու փորձերի մասին՝ հօգուտ իշխող «Արդարություն ու զարգացում» կուսակցության։
