ՀԱԿ խմբակցության ղեկավար Լևոն Զուրաբյանն այսօր լրագրողների հետ զրույցում նշեց, որ ՀԱԿ-ի ներկայացուցիչները հանդիպումներ են ունեցել Արմավիրի մարզի գյուղերում. «Աղետալի խնդիր կա՝ կապված գյուղացիների վերցրած վարկերի հետ. հարյուր-հազարավոր գյուղացիներ վարկեր են վերցրել, գրավադրել են իրենց տները, և տույժ-տուգանքներն այնքան են մեծացել, որ հավասարվել են մայր գումարին: Խոսքը մի քանի անբարեխիճ վարկառուների մասին չէ, խնդիրը համատարած է: Այս խնդրի պատճառով ուղղակի փլուզվում է մեր գյուղատնտեսությունը:
Սկսում եմ ենթադրել, որ այստեղ չարամիտ քաղաքականություն կա. գուցե մարդանց զանգվածաբար այդ վիճակին են հասցնում, որպեսզի կարողանան սնանկացած վիճակում նրանցից վերցնել իրենց հողերը, տները և խոշոր տնտեսություն ստեղծել… Այս խնդրին լուծում է պետք տալ: Պետք է միջգերատեսչական կոորդինացում տեղի ունենա խնդրի լուծման համար: Ես ԱԺ նախագահին առաջարկեցի նման միջգերատեսչական քննարկմամբ հանդես գալ, ԱԺ լսումներ կազմակերպել և այդ հարցը քննարկել: Այս խնդիրը կապված է մեր անվտանգության, մեր տնտեսության հետ և կարող է մի օր այնպես պայթել, որ սրա տակից չկարողանանք դուրս գալ:
Լրագրողների հետ զրույցում ՀԱԿ ղեկավարն անդրադարձավ նաև ԲՀԿ նախկին ղեկավար Գագիկ Ծառուկյանի՝ հնարավոր վերադարձի վերաբերյալ հարցին՝ նշելով, որ դա յուրաքանչյուր քաղաքական ուժի սահմանադրական իրավունքն է. «Ոչ ոք իրավունք չունի անհանգստանալու, վախենալու կամ խառնվելու այլ քաղաքացիների կողմից իրենց սահմանադրական իրավունքների իրականացման պատճառով»:
Լ. Զուրաբյանը հրաժարվեց գնահատականներ հնչեցնելուց, միևնույն ժամանակ հարցին՝ Ծառուկյանի վերադարձը վտանգավոր չէ՞ ընդդիմության համար՝ ընտրազանգվածին տիրանալու առումով, Զուրաբյանը պատասխանեց. «Չի կարելի համագործակցությունը արեժեզրկել միայն այն պատճառով, որ վերջին հանգրվանում չեղավ այն, ինչ պլանավորվում էր: Դա իհարկե տխուր փաստ էր, որ այն, ինչ պլանավորում էինք՝ իշխանափոխություն չեղավ»:
«Ամեն քաղաքական իրավիճակ թելադրում է իր լուծումները: Մենք կլիշեների, կարծրատիպերի գերի չենք, կփորձենք լուծումներ գտնել,- ընդգծեց Զուրաբյանը՝ անդրադառնալով Գ. Ծառուկյանի վերադարձին և նրա հետ հնարավոր գործակցությանը:
Մանրամասները՝ տեսանյութում:
