«Դա իրենց երկրի գործն է, իսկ մեր` հայ պատգամավորների խնդիրն այն է, որ կարողանանք անընդհատ բարձրացնել Հայոց ցեղասպանության հարցը, և դա բարձրացվում է»,- «Առաջին լրատվականի» հետ զրույցում, անդրադառնալով Վրաստանի խորհրդարանի կողմից չերքեզական ցեղասպանության ճանաչմանը, կարծիք հայտնեց Վրաստանի խորհրդարանի հայազգի պատգամավոր Արմեն Բայանդուրյանը:
Նա նշեց, որ կգա ժամանակը, և վրաց խորհրդարանը կընդունի նաև Հայոց ցեղասպանությունը. «Եթե դա իմ ձեռքին լիներ, ապա հենց վաղը կընդունեին, բայց դա իմ ձեռքին չէ»:
Բայանդուրյանը նշեց, որ եթե վրաց խորհրդարանն այժմ ճանաչել է չերքեզական ցեղասպանությունը, ապա այս պահին իրենց համար դա է տեսանելի խնդիրը, և հայ պատգամավորները չեն կարող վրաց խորհրդարանականներին ստիպել խնդրին այլ կերպ նայել:
Բայանդուրյանը բացառեց, որ չերքեզական ցեղասպանությունը Վրաստանի խորհրդարանը ճանաչել է միայն նրա համար, որ լարված են հարաբերությունները Ռուսաստանի հետ:
«Ես կողմ եմ, որ պետք է ընդունեն ցեղասպանությունները, և մենք պետք է այնպես անենք, որ Հայոց ցեղասպանությունը ևս ընդունեն»,- եզրակացրեց Բայանդուրյանը: