Պաշտպանության նախարարությունը նպատակ է դրել մինչև մյուս 2017թ-ի ամառը հիմնարար կերպով վերանայել Հայաստանի ռազմական օրենսդրությունը: Այս մասին լրատվամիջոցների ներկայացուցիչների հետ հանդիպման ժամանակ հայտարարել է ՀՀ պաշտպանության նախարար Վիգեն Սարգսյանը:
«25 տարվա ընթացքում ունեցել ենք օրենսդրական զարգացման որոշակի գործընթաց: Բազմաթիվ օրենքներ ընդունվել են իրավիճակային թելանդրանքով: Այսօր հասել ենք մի վիճակի, երբ կարող ենք այդ օրենսդրությունը համադրել և այն ծառայեցնել ոչ թե պարզ իրավական խնդիրները կարգավորելուն, այլ մեր քաղաքականությունն իրավական ակտի տեսքով արտացոլելուն»,- նշեց նախարար:
Այս համատեքստում Վիգեն Սարգսյանը որպես օրինակ նշեց երկրի պաշտպանության գործին ծագումով հայերի մասնակցության խնդիրը: Նա հիշեցրեց, որ «ծագումով հայ» հասկացությունն ամրագրված է Սահմանադրությամբ: Շատ քիչ երկրներ կան, որոնք Սահմանադրությամբ ամրագրել են այս հասկացությունը: «Մենք նշել ենք, որ ծագումով հայերը քաղաքացիությունը ստանում են պարզեցված կարգով, այսինքն` մենք ընդունում ենք, որպես պետություն, որ կան մարդիկ, ովքեր, քաղաքացի չլինելով, պետության հետ կարող են ունենալ որոշակի առնչություն: Ակնհայտ է, որ այդ մարդիկ լարված, սրված իրավիճակներում ցանկանում են հայտնվել պաշտպանության համակարգում և իրենց նպաստը բերել երկրի պաշտպանության գործում: Մեր օրենսդրությունը պետք է շատ հստակ անդրադառնա ծագումով հայերի՝ պաշտպանության գործին մասնակցելու խնդիրներին»,- նշեց նախարարը:
Երկրորդ խնդիրն առնչվում է կամավորներին: «Մենք ունենք և ունենալու ենք կամավորներ, քանի դեռ պատերազմներով անցնող երկիր ենք: Ապրիլյան իրադարձությունները ցույց տվեցին, որ դա մի կողմից լուծում և առավելություն լինելով, մյուս կողմից կարող է լինել բավականին լուրջ խնդիրների աղբյուր: Մենք պետք է հստակ տարանջատենք այն քաղաքացուն, ով զորահավաքի ենթակա է այն քաղաքացուց, ով դրան ենթակա չէ, բայց ցանկանում է մասնակցել պաշտպանության գործին: Այդ երկրորդը կամավորական է: Պետք է լինի հստակ իրավական կարգավորում, թե ինքն ինչպես է անցնում ծառայությա ն, ինչ իրավական պարտավորություններ ունի, ինչ պարտավորություններ իր հանդեպ ունի պետությունը: Մեր տիպի երկրների համար զորահավաքային ռեսուրսի արդյունավետ կառավարումը կարևորագույն խնդիրներից մեկն է: Այս ու մի շարք այլ ուղղություններով սկսել ենք ընդարձակ ծրագիր»,- շեշտել է պաշտպանական գերատեսչության ղեկավարը:
Վիգեն Սարգսյանը նշեց, որ նյութական և մարդկային ռեսուրսների արդյունավետ կառավարման համար պաշտպանական համակարգում կներդրվեն էլեկտրոնային կառավարման համակարգեր: «Նշանակել եմ օգնական էլեկտրոնային կառավարման համակարգերի հարցով, ում միակ աշխատանքն է պաշտպանության ոլորտում ներդնել էլեկտրոնային կառավարման համակարգեր, որոնք պետք է բարձրացնեն արդյունավետությունը, ապահովեն խնայողությունը և լուծեն նյութական ու մարդկային ռեսուրսների կառավարման մի շարք խնդիրներ»,- ամփոփել է նախարարը:
