ԱԺ նիստում ՀՀ պաշտպանության ժամանակ, մարտական գործողությունների ընթացքում վնասներ ստացած զինծառայողների փոխհատուցման մասին նախագծի քննարկման ժամանակ ՀԱԿ խմբակցության անդամ Նիկոլ Փաշինյանն իր ելույթում հայտարարեց, որ կողմ է քվեարկելու այս նախագծին. «Քանի որ սա հայոց բանակի մարտունակությունը բարձրացնող օրենքի նախագիծ է: Այն զինվորը, որի միտքն ազատ է մտահոգությունից, թե ինչ է լինելու իր ընտանիքի հետ, արդյոք սոված կմնա՞ն իր երեխաներն ու ծնողները, եթե իր հետ մի բան լինի, այդպիսի զինվորն ավելի է կենտրոնացված իր մարտական գործողությունների վրա ու նրա գործողություններն ավելի պրոֆեսիոնալ են»:
Փաշինյանի խոսքով՝ ՀՀ քաղաքացիներից շատերը արդարացիորեն նկատում են՝ եթե իշխանությունները, գեներալները քիչ թալանեին, զինվորները շատ թե քիչ արժանապատիվ վարձատրություն կունենային: «Այո, նաև այդ պատճառով պիտի վճարենք հազար դրամները, քանի որ, որպես պետություն, չենք կարողացել ստեղծել այնպիսի իշխանություն, որը կլինի արդյունավետ: Սա մի յուրօրինակ տուգանք է բոլորիս համար՝ արդյունավետ պետություն ունենալու գործում մեր կրած խայտառակ պարտությունների համար…
Պարո՛ն նախարար, զինվորին մատակարարվող սապոգների քառասուն տոկոսը քսան րոպեի ընթացքում քրքրվում է: Եթե ծնողներին ուզում եք լավություն անել, եկեք այնպես անենք, որ ծնողը ազատվի Վերնիսաժից սապոգ, ներքնաշոր ու ատամի մածուկ առնելուց: Բանակում զինվոր պահելը ծնողի համար հիմա ուսանող պահելուց ավելի բարդ է»:
Փաշինյանն անդրադարձավ նաև զինվորականների նյութական, բնակարանային կարիքներին՝ ասելով. «Զոհվածների մասին են հիմա խոսում, սակայն ողջերի մասին ևս չպետք է մոռանալ… Երբեմն տպավորություն է, որ մենք ուզում ենք այնպես անել, որ մեր սպաների ու զինվորների համար մեռնելն ավելի ձեռնտու լինի, քան ապրելը: Իսկ ուր մնաց պետության գործառույթը:
Տիկին Ռիտա Սարգսյանն է ասում՝ մարդա հարյուր դրամ տվեք, որ մանկական առողջապահության հարցերը լուծենք…»:
Մանրամասները՝ տեսանյութում:
