Թուրք-ադրբեջանական միասնական բանակի մասին խոսք անգամ լինել չի կարող: «Առաջին լրատվական»-ի հետ զրույցում այս մասին ասաց Ռազմական կանխատեսման կենտրոնի տնօրեն, ռուսաստանցի ռազմական փորձագետ Անատոլի Ցիգանոկը՝ անդրադառնալով rosbalt.ru-ի այն հրապարակմանը, համաձայն որի՝ Ադրբեջանն ու Թուրքիան սկսում են միասնական բանակի ձևավորման գործընթացը: Ռուսական լրատվամիջոցը գրել էր, թե Ադրբեջանի խորհրդարանի անվտանգության և պաշտպանության հանձնաժողովի անդամ Զահիդ Օրուջն ասել է, որ մարտական ստորաբաժանումների համատեղ ուսումնավարժանքները վկայում են այն մասին, որ երկու պետություններն էլ տարածաշրջանային խնդիրների և անվտանգության հարցերի վերաբերյալ միասնական հայացք են ձևավորում, և տնտեսական, քաղաքական ու դիվանագիտական հարաբերություններին զուգահեռ՝ ստեղծվում է նաև ամենակարևոր՝ ռազմական բաղադրիչը:
Անատոլի Ցիգանոկն ասաց, որ Ադրբեջանի և Թուրքիայի միջև ժամանակ առ ժամանակ ռազմական ուսումնավարժանքներ են անցկացվում, ինչպես այս շաբաթ: Նրա փոխանցմամբ՝ թուրք-ադրբեջանական ռազմատեխնիկական համագործակցությունը ենթադրում է ուսումնավարժանքներ և Թուրքիայի, և Ադրբեջանի տարածքում, որը համաշխարհային պրակտիկայում ընդունված է: Ռուսաստանցի ռազմական փորձագետը տեսակետ հայտնեց, թե սա չի նշանակում, թե ստեղծվում է միասնական բանակ, և չի էլ հավատում, թե միասնական բանակ կստեղծվի:
«Առաջին հերթին դրա համար պետք են որոշակի համաձայնություններ և պայմանավորվածություններ: Երկրորդ հերթին՝ երբ Ադրբեջանի նախագահ Իլհամ Ալիևն ասաց, որ երկու երկրները մեկ ազգ են, դա բավականին խորամանկ քայլ էր: Ես միշտ ասում եմ հետևյալի մասին՝ այդ պարագայում Լեռնային Ղարաբաղն ու Հայաստանը ևս պետք է նույն կերպ բնութագրել: Հարցն այն է, որ Թուրքիան որոշումներ է կայացնում՝ իր իսկ շահերը հաշվի առնելով: Թուրքիան ոչ մի կերպ չի կարողանում քրդական հարցը լուծել: Նա այլ դժվարություններ ևս ունի և կունենա հավելյալ դժվարություններ, եթե ձևավորի համատեղ բանակ Ադրբեջանի հետ: Դա շահավետ չի լինի Թուրքիայի համար: Սրան դեռ պետք է արձագանքեն թուրքական իշխանությունները»,- ասաց Անատոլի Ցիգանոկը՝ հավելելով, թե չի կարծում, որ Ադրբեջանի այդ նախաձեռնությունը հաջողությամբ կպսակվի:
