2016 թվականի հոկտեմբերի 23-27-ը ՀՀ ԱԺ պատվիրակությունը՝ պատգամավորներ Կարինե Աճեմյանն ու Հեղինե Բիշարյանը, Ժնևում մասնակցել են Միջխորհրդարանական միության 135-րդ վեհաժողովին: Վեհաժողովի օրակարգում ընդգրկված էին հետևյալ հարցերը՝ Մարդու իրավունքների չարաշահումն իբրև հակամարտության նախանշան. խորհրդարաններն իբրև վաղ արձագանքողներ. Լիարժեք, անվտանգ կերպով և առանց միջամտության քաղաքական գործընթացներին կանանց մասնակցության ազատությունը. այդ նպատակին հասնելու համար տղամարդկանց ու կանանց միջև գործընկերության ստեղծումը: Հոկտեմբերի 23-ին տեղի ունեցավ Կանանց ֆորումը, որին մասնակցեց Կ. Աճեմյանը, ով հանդես եկավ ելույթով: Այն նվիրված էր վեհաժողովի օրակարգի 2-րդ կետին: Հարցի վերաբերյալ ծավալվեց աշխույժ քննարկում: Մասնակիցներն իրենց ելույթներում բերում էին սեփական երկրների օրինակը, կիսվում իրենց փորձով:
Այդ օրը տեղի ունեցավ նաև «Եվրասիա» աշխարհաքաղաքական խմբի նիստը, որի ժամանակ քննարկվեցին վեհաժողովի օրակարգում ընդգրկվելիք հրատապ հարցերը: Ելույթ ունեցավ կազմակերպության Գործադիր կոմիտեի անդամ, ռուս պատգամավոր Վ. Կոսաչյովը, ով ներկայացրեց իրավիճակը: Սիրիայի հետ մեկտեղ Ռուսաստանը ներկայացրել էր հրատապ հարց, որը վերաբերում էր Սիրիայում տիրող իրավիճակին: Ապա նա խոսեց ՄՄ-ի՝ 2017 թվականին Դաքայում տեղի ունենալիք վեհաժողովի ժամանակ ներկայացվելիք բանաձևի նախագծի մասին, որի համազեկուցողներից մեկն էլ ինքն էր: ՀՀ ԱԺ պատվիրակությունը բանաձևի նախագծի վերաբերյալ ներկայացրել էր երկու փոփոխություն:
Օրակարգի մյուս հարցը վերաբերում էր կազմակերպության տարբեր հանձնաժողովներում թափուր տեղերը լրացնելուն: Կազմակերպության Ժողովրդավարության և մարդու իրավունքների մշտական հանձնաժողովի բյուրոյի կազմում առաջարկվեց Կ. Աճեմյանի թեկնածությունը:
Հոկտեմբերի 24-ին տեղի ունեցավ Ղեկավար խորհրդի նիստը, որի ժամանակ քննարկվեցին մի շարք հարցեր, այդ թվում՝ կազմակերպության անդամակցության, նախագահի և գլխավոր քարտուղարի հաշվետվության, ֆինանսական վիճակին առնչվող հարցեր: Ապա տեղի ունեցավ վեհաժողովի բացումը և գլխավոր հարցի քննարկումը: Օրվա վերջում տեղի ունեցավ քննարկում և քվեարկություն վեհաժողովի օրակարգում հրատապ հարց ընդգրկելու վերաբերյալ: Ներկայացված էր ութ հարց: Երեք հարց օրակարգից հանվեց, մնաց հինգը: Ձայների մեծամասնությամբ օրակարգ մտավ Գերմանիայի և Մեքսիկայի ներկայացրած հարցը՝ «Պատերազմը և մարդասիրական դաժան վիճակը Սիրիայում, մասնավորապես Հալեպում»: ՀՀ ԱԺ պատվիրակությունը երեք հարցի քվեարկության ժամանակ ձեռնպահ էր, 11 կողմ ձայն տվեց Ռուսաստանի և Սիրիայի ներկայացրած հարցին, իսկ Գերմանիայի և Մեքսիկայի ներկայացրած հարցին քվեարկեց հետևյալ կերպ՝ վեց կողմ, հինգ ձեռնպահ:
Հոկտեմբերի 25-ին տեղի ունեցավ հանդիպում ՀՀ ԱԺ պատգամավորների և ՄՄ-ում Շվեդիայի պատվիրակության միջև՝ վերջինիս նախաձեռնությամբ: Հայ պատգամավորները պատասխանեցին եվրոպացի իրենց գործընկերների հարցերին, որոնք վերաբերում էին ՀՀ-ԵՄ հարաբերություններին: Նշվեց, որ ներկայումս ընթանում են ԵՄ-ի հետ շրջանակային համաձայնագրի շուրջ բանակցությունները, ակտիվ գործունեություն է ծավալում Եվրանեսթ խորհրդարանական վեհաժողովը:
Հոկտեմբերի 25-ին և 26-ին շարունակվեցին ընդհանուր և հրատապ հարցերի քննարկումները: Ընդհանուր հարցի վերաբերյալ ելույթ ունեցավ ՀՀ ԱԺ պատգամավոր Կարինե Աճեմյանը: ոկտեմբերի 27-ին շարունակվեց Ղեկավար խորհրդի օրակարգում ընդգրկված հարցերի քննարկումը: Ի թիվս այլ հարցերի՝ քննարկվեց նաև 2017 թվականին ՄՄ-ի 136-րդ և 137-րդ վեհաժողովների անցկացման վայրի վերաբերյալ հարցը: Որոշվեց, որ 136-րդ վեհաժողովը տեղի կունենա Բանգլադեշի մայրաքաղաք Դաքայում, իսկ 137-րդը՝ Սանկտ Պետերբուրգում: Վերջին հարցի վերաբերյալ Ուկրաինայի պատվիրակությունն ուներ առարկություններ, որոնք էլ ներկայացրեց Ղեկավար խորհրդին: Ուկրաինայի պատվիրակության պահանջով անցկացվեց անվանական քվեարկություն: 157 ձայներից որոշմանը կողմ ձայների թիվը 138 էր, դեմ՝ 19: Ապա ելույթ ունեցավ ՌԴ Դաշնային ժողովի Դաշնության խորհրդի նախագահ, Ռուսաստանի Դաշնության պատվիրակության ղեկավար Վ. Մատվիենկոն: Ղեկավար խորհրդի նիստից հետո տեղի ունեցավ վեհաժողովի նիստը, որի ժամանակ ընդունվեցին բանաձևերի նախագծերը: Դրանով Միջխորհրդարանական միության 135-րդ վեհաժողովն ավարտեց իր աշխատանքը: