Հայտնի է, որ նոյեմբերի վերջից ռուսական «Պոբեդա» ավիաընկերությունը Գյումրիի «Շիրակ» օդանավակայանից շաբաթական երեք օր դեպի Մինվոդի և Վորոնեժ թռիչքներ է իրականացնելու և ավիատոմսերի սակագինը սկսվելու է 10 000 դրամից:
ՀՀ Քաղավիացիայի գլխավոր վարչության նախկին պետ Շահեն Պետրոսյանն «Առաջին լրատվական»- ի հետ թեմայի շուրջ զրույցում նշեց. «Պոբեդայի հայտարարությանը թերահավատորեն եմ վերաբերվում, որովհետև տարբեր կարծիքներ եմ կարդացել, տարբեր տեղեկություններ ունեմ, լավ համբավ չունի այդ ավիաընկերությունը՝ «Աէրոֆլոտ»- ի դուստր ավիաընկերություններից է: Դրականն այն է, որ պարապուրդի մատնված Գյումրիի օդանավակայանը կշահագործվի: Բայց երկու խնդիր կա՝ ինչքանո՞վ է այդ օդանավակայանի անվտանգությունն ապահովված և ինչքանո՞վ է նպաստելու այդ ավիաընկերությունը, որը միջազգային լավ համբավ չունի: Հնարավոր է, որ սա ժամանակավոր երևույթ լինի, երկու-երեք ամիս թռիչնքեր իրականացնի և հետո հրաժարվի, ինչպես հրաժարվեց «Զվարթնոց»- ից թռիչքներ իրականացնելուց»:
Գնային քաղաքականության վերաբերյալ Շ. Պետրոսյանը նշեց. «Ասվում է, որ տոմսերի սակագները սկսվելու են 10 000 դրամից, սա ես համարում եմ գովազդային հնարք, 5-10 տոմս կվաճառեն իրենց յուրայիններին, մնացածը նույն գներով, ինչ-որ կար: Միայն կարող ենք խոսել այն մասին, որ Գյումրիի օդանավակայանից 10 000 դրամ օդի փողը հանված է, և քանի որ այնտեղ սպասարկման գներն ավելի ցածր են, քան «Զվարթնոց»- օդանավակայանինը, հնարավոր է, որ տոմսերի գինը համեմատաբար ցածր լինի»: