Թուրքական Cihan լրատվական գործակալության փոխանցմամբ, Ստամբուլի Ֆաթիհ համալսարանը գիտական հետազոտությունների նախագծի շրջանակներում հարցախույզ է անցկացրել Թուրքիայի հարևան երկրներում: Յուրաքանչյուր երկրում դրան մասնակցել է 50 մարդ:
Հարցախույզի մասնակիցների կարծիքով, վերջին տարիներին Թուրքիայի արտաքին քաղաքականությունում կարևոր փոփոխություններ են գրանցվել, ինչը, մասնակիցներից 70 տոկոսի կարծիքով, պայմանավորված է վարչապետ էրդողանի գլխավորած «Արդարություն և զարգացում» կուսակցության (ԱԶԿ) և Թուրքիայի՝ ԵՄ-ին անդամակցության ձգտման գործոններով:
55 տոկոսը կարծում է, որ Թուրքիան սկսել է առավել հավասարակշիռ քաղաքականություն վարել արևմտյան ու արևելյան երկրների հանդեպ: 90 տոկոսի կարծիքով, Թուրքիան սկսել է առավել ակտիվ արտաքին քաղաքականություն վարել: Սրան համակարծիք չէ հայ մասնակիցների 60 տոկոսը:
«Ձեր հարևան երկրների թվում ո՞րն է ամենալավ հարևանը» հարցին պատասխանելով՝ մասնակիցների 60 տոկոսը նշել է Թուրքիան: Սակայն Հայաստանում և Հունաստանում Թուրքիան որակվել է որպես վատ հարևան:
Իսկ «Ներկայիս դրությամբ առաջինը ո՞ր երկիրն եք տեսնում որպես տարածաշրջանային ուժ» հարցին մասնակիցների 27 տոկոսը նշել է Թուրքիան, 13 տոկոսը՝ Իրանը: Ուշագրավ է, որ Թուրքիային որպես վատ հարևան դիտարկող Հունաստանում նույնպես Թուրքիան տեսնում են տարածաշրջանային ուժի դերում:
Սակայն ամենահետաքրքրական հարցը հետևյալն է. «Եթե Ձեր երկրում քաղաքացիական պատերազմ բռնկվի, որ երկրում կապաստանեք»: Մասնակիցների 27 տոկոսը նշել է Թուրքիան, իսկ 4.5 տոկոսը՝ Վրաստանը: 7 տոկոսն էլ նշել է, որ կմնա իր երկրում:
Թուրքիայում տեղի ունեցող ժողովրդավարական գործընթացների նկատմամբ դրական դիրքորոշում ունի հայ մասնակիցների 73 տոկոսը, վրացիների 70 տոկոսը և հույների 36 տոկոսը:
Հիշեցնենք, որ ԱԶԿ-ն Թուրքիայում իշխանության եկավ 2002 թվականի նոյեմբերին և իր իշխանության ընթացքում իրականացրած ժողովրդավարական (արևմտյան) բարեփոխումների քանակով գերազանցեց իր նախորդ բոլոր կառավարություններին միասին վերցրած:
