Վերջերս Al Jazeera-ին տված հարցազրույցում նախագահ Սերժ Սարգսյանը հերքել էր նախկինում արած այն հայտարարությունը, որ սահմանադրական փոփոխություններից հետո չի հավակնելու վարչապետի պաշտոնին, հիմա նշում է, որ դա կախված է ընտրությունների ելքից, թե որքան ձայն կստանա ՀՀԿ-ն: Ի՞նչ եք կարծում մեր քաղաքական դաշտում հիմա կա՞ ՀՀԿ-ին հակադիր ուժ, որպեսզի դա տեղի չունենա, թե՞ անհրաժեշտ է ընդդիմադիր դաշտի միավորում. «Առաջին լրատվական»- ի հետ զրույցում անդրադառնալով այս հարցին «Հոգևոր Հայաստան» կուսակցության նախագահ Վարդան Խաչատրյանը նշեց. «Քաղաքականության մեջ ընդունված կարգ կա, որ եթե արմատական հիմնադրույթների փոփոխություն է կրում անգամ պայմանագիրը, այն վերանայվում է: Հիմա երկիրը մի կարգավիճակից անցում է կատարում մեկ այլ կարգավիճակի, այսինքն՝ մեր հանրապետությունը կիսանախագահականից անցում է կատարում դեպի խորհրդարանական կառավարման ձևի, և այս առումով հասկանալի է, որ ընթացող այս հարահեղուկ իրավիճակը ենթադրում է արմատական փոփոխություններ»:
Վ. Խաչատրյանի գնահատմամբ՝ այսօր ՀՀԿ-ի իրական քաղաքական ազդեցությունը բարձր է գոյություն ունեցող ցանկացած կուսակցությունից. «Բայց գոյություն ունի մեկ հիմնական չափորոշիչ. դա հավաքականնության ձևավորման դաշտն է, այսինքն՝ այն հավաքականությունը, որին կհավատա մեր ժողովուրդը:
Քաղաքական ուժերի միջև եթե ինչ-որ զարգացումներ ենք տանում, դա չի նշանակում, որ ժողովուրդը ականջալուր է լինելու այն ամենին, ինչ ասվեց: Քաղաքական դաշտում շատ-շատերի համար բացառիկ և անհերքելի ճշմարտությունը հենց իրենց բերանից դուրս եկածն է:
Բայց պետք է հաշվի առնենք, որ կա՛մ ժողովուրդը կարձագանքի աստիճանաբար ձևավորված, իր մեջ հույս առաջացնող, անվիճելի հավաքականությանը, կա՛մ ներկայիս իրավիճակը կպահպանվի»:
Անդրադառնալով հարցին, թե ժողովրդի համախմբման համար ինչ է անհրաժեշտ, Վ. Խաչատրյանը նշեց, որ առաջին հերթին անվիճելիորեն առաջնորդների փոփոխություն է անհրաժեշտ, «քանի որ առաջնորդների մի մասը հիասթափություն է առջացրել ժողովրդի մեջ, մի այլ մասը դրսևորում է լուրջ հոգնածություն՝ գուցե ընթացիկ գործերից, գուցե անհուսությունից, որը կուսակացական շարքերում գոյություն ունի, գուցե լումպենիզացիայի այն երևույթից, որ քաղաքական դաշտում այսօր շատ լուրջ ծավալվել է»:
Վ. Խաչատրյանի կարծիքով՝ անհրաժեշտ է նաև, որ ժողովրդի աչքի առաջ բաց, ուղիղ եթերով ընթացող բանակցություններ լինեն, «որտեղ ազնիվ նվիրումը երկրորդայնացնում է կուսակցությունների էգոցենտրիկ կողմնորոշումը»:
Վ. Խաչատրյանի դիտարկմամբ՝ բոլոր քաղաքական ուժերի մեջ անվստահություն կա, միմյանց չընկալելու խնդիր կա. «Ինչպես ժողովրդական ասացվածքն է ասում՝ ղոնախը ղոնախին չի սիրում, տանտերն էլ երկուսին էլ չի սիրում»:
«Իշխանափոխություն կլինի, թե առանց դրա տրանսֆորմացիա տեղի կունենա, կամայական տարբերակ ընդունլի է. երբ գոյություն ունի հավաքական, ոտքի կանգնած ժողովուրդ, երբ որ ժողովուրդը հավատում է ինչ-որ հավաքական ուժի, դրա ճնշումով էլ պայմանավորվում են դրական անցումները այս խիստ վտանգավարոր ժամանակահատվածում, երբ հրո ճարակ է դառնում մեր շրջապատը: Հասկանալի է, որ այդ բոցը հասնելու է նաև մեր շեմին: Միայն միասնական հայ ազգի ընդհանրական դաշտն է, որ ի վիճակի է հետ մղել սպառնալիքները»,- ընդգծեց Վ. Խաչատրյանը:
Մանրամասները՝ տեսանյութում: