Հետաքննությունների դաշնային բյուրոն 2011թ. իր աղբյուրներին թույլատրել է օրենքը խախտել 5,6 հազար անգամ, այս մասին է գրում USA Today հրատարակչությունը՝ հղում անելով իր տրամադրության տակ հայտնված փաստաթղթերին:
Բյուրոյի գործակալները իրենց տեղեկատուներին թույլ են տվել օրական 15 օրինախախտում անել, այդ թվում նաև թմրանյութերի առք և վաճառք, կողոպուտների նախապատրաստում և իշխանության ներկայացուցիչներին կաշառում: Գործակալների աղբյուրները հիմնականում հանցագործներն են: Բյուրոյի ներկայացուցիչներն ավելի վաղ արդեն հայտարարել էին, որ իրենց աղբյուրներին թույլատրում են խախտել օրենքը, քանի որ դա հետաքննությունների անբաժանելի մասն է կազմում:
Սակայն, ինչպես նշում է հրատարակչությունը, օրինախախտումների այս թիվն առաջին անգամ է հրապարակվել: ՀԴԲ-ն սովորաբար այն հանձնում է արդարադատության նախարարությանը:
ՀԴԲ-ի պաշտոնական ներկայացուցիչը չի մեկնաբանել այս տեղեկատվությունը՝ նշելով միայն, որ աղբյուրների կողմից օրենքի խախտման հանգամանքները խստորեն վերահսկվում են:
