«Մեդիա կենտրոնում» կազմակերպված քննարկման ժամանակ, խոսելով վերջին շաբաթում ղարաբաղաադրբեջանական սահմանին տեղի ունեցողի և ԵԱՀԿ Մինսկի խմբի համանախագահների տարածաշրջանային այցի մասին, ասաց ԱԺ ՀՀԿ խմբակցության պատգամավոր Շիրակ Թորոսյանը կարծիք հայտնեց, որ ադրբեջանական զինուժի կողմից ներթափանցման փորձը նպատակ ուներ նսեմացնելու ԵԱՀԿ Մինսկի խմբի համանախագահների դերը:
«ԵԱՀԿ Մինսկի խմբի համանախագահների այցի հիմնական նպատակը Վիեննայի և Սանկտ Պետերբուրգի համաձայնությունները կյանքի կոչելն էր: Մենք գիտենք, որ այդ համաձայնությունների ձեռքբերումից հետո Բաքուն անընդհատ տարբեր պատճառաբանություններով, խուսանավումներով հրաժարվում էր դրանցից»,- նշեց Շիրակ Թորոսյանը և հավելելեց, որ նրանց կողմից իրականացված դիվերսիոն փորձը ևս իրենց դիրքորոշումը ներկայացնելու հերթական քայլերից էր:
Շիրակ Թորոսյանի խոսքով՝ համանախագահներն իրենց այցի ժամանակ պետք է շեշտադրեին Վիեննայի և Սանկտ Պետերբուրգի պայմանավորվածությունները. «Դատապարտող հայտարարություններով հանդես չեկան, որպեսզի լարվածություն չստեղծեին: Նրանք իրավիճակը գնահատեցին «ընդհանուր առմամբ հանգիստ», ինչը նշանակում էր, որ նրանց ձգտումն ավելի շատ Սանկտ Պետերբուրգի համաձայնությունների իրագործումն է»:
Հայաստանի Դեմոկրատական կուսակցության նախագահ Արամ Սարգսյանի դիտարկմամբ՝ անգամ ապրիլյան պատերազմից հետո ԵԱՀԿ Մինսկի խմբի համանախագահների կողմից կոշտ գնահատականներ չեղան: «Միջնորդները պետք է համապատասխան գործողություններ կատարեին: Հստակ ձևակերպեին, թե ով է հարձակվողը, ով սկսեց զինված գործողությունները»,-նշեց Արամ Սարգսյանը՝ հավելելով, որ ԵԱՀԿ Մինսկի խմբի այս կեցվածքն էլ թույլ է տալիս, որ Ալիևը հայտարարություններով հանդես գա, պահանջի 7 տարածքների վերադարձ, նշի ԼՂ-ին Ադրբեջանի կազմում մարզային կարգավիճակ տալու մասին: Ա. Սարգսյանի կարծիքով հայկական հստակ պետք է ներկայացնի, թե ինչ փոխզիջումների մասին կարող է լինել խոսքը: «Աշխարհը պետք է հասկանա, թե ինչ է Հայաստանն ուզում և ինչու է ուզում»:
ԱԺ նախկին փոխնախագահ Կարապետ Ռուբինյանի դիտարկմամբ՝ համանախագահները տարածաշրջանային այցի ժամանակ կոշտ հայտարարություններով հանդես չեկան, որ չսրեն լարվածությունը․ «Համանախագահները խուսափեցին Ադրբեջանի կողմից լարվածություն դրսևորումից: Ինչո՞ւ: Որովհետև Հայաստանի կողմից լարվածություն երբեք չի դրսևորվում, անգամ ապրիլյան պատերազմի ժամանակ Հայաստանի կողմից արված հայտարարություններն անհետևանք մնացին»:
«Հայաստանի այդպիսի անատամ քաղաքականության պատճառով ԵԱՀԿ Մինսկի խմբի համանախագահներին մնում է միայն այնպես անել, որ Ադրբեջանը չսրի իրավիճակը»,- ընդգծեց Կարապետ Ռուբինյանը:
Մանրամասները՝ տեսանյութում:
