Ամերիկյան Associated Press լրատվական գործակալության փոխանցմամբ՝ Լեհաստանի պաշտպանության նախարար Անտոնի Մաչերևիչը պնդում է, որ Եգիպտոսը մտադիր է խորհրդանշական 1 դոլարով Ռուսաստանին վաճառել «Միստրալ» բազմանշանակ դեսանտային նավերը:
Այդ նավերը Ֆրանսիայում կառուցվել էին Ռուսաստանի համար, իսկ հետո, երբ Փարիզը հրաժարվեց դրանք հանձնել Մոսկվային, վաճառվել էին Կահիրեին։
Մաչերևիչը, վկայակոչելով քաջատեղյակ աղբյուրներին, հայտարարել է, որ Եգիպտոսն այժմ պատրաստվում է այդ նավերը հանձնել Ռուսաստանին. «Եթե Եգիպտոսը հրաժարվի այդ գործողությունից, ապա դա կծառայի համայն աշխարհում խաղաղությանը»։
Ֆրանսիան ու Ռուսաստանը «Միստրալ» ռազմանավերի կառուցման մասին պայմանագիրը ստորագրել են 2011 թվականի ամռանը։ 2014 թվականին Ֆրանսիան սառեցրել է ռազմանավերի մատակարարումը Ռուսաստանին՝ կապված Ուկրաինայում տիրող իրավիճակի հետ, իսկ 2015 թվականի օգոստոսին պայմանագիրը խզվել է կողմերի համաձայնությամբ։
