Կառավարության հրավիրած ԱԺ արտահերթ նիստում կառավարության ծրագրի քննարկմանը ՀԱԿ խմբակցության անդամ Նիկոլ Փաշինյանը վարչապետ Կարեն Կարապետյանից հետաքրքրվեց՝ ինչպե՞ս է վերաբերվում Սերժ Սարգսյանին. «Քանի որ սովոր ենք, որ նախորդ վարչապետերը ծրագիր ներկայացնելիս անընդհատ հղում են անում Սերժ Սարգսյանի նախընտրական ծրագրերին: Դուք դա չեք անում, արդյո՞ք դա նշանակում է, որ նա ձախողել է իր նախընտրական ծրագիրը, կամ մտածում եք՝ նրա ու ձեր անունը, եթե կապեն իրար, վարկաբեկիչ կարող է լինել Ձեր կառավարության համար:
Ինչ եք մտածում. միգուցե Սերժ Սարգսյանը պետք է մանրից իրերը հավաքի ու իշխանության ժառանգականության հարցերը լուծի՞: Այդ կոնտեքստում ձեր դերակատարությունն ինչպե՞ս եք պատկերացնում, ձեր անդամները ո՞ւմ են համարում առաջնորդ-ղեկավար Ձե՞զ, թե Ս. Սարգսյանին»:
Նիկոլ Փաշինյանը նաև խոսեց մոնոպոլիաներից. « Ինչպե՞ս եք կարծում, օրինակ, Սամվել Ալեքսանյանի շաքարային մոնոպոլիան օրինակա՞ն է ձևավորվել, թե՞ ոչ: Սերժ Սարգսյանի փեսան՝ Միքայել Մինասյանը, մեդիա դաշտում գերիշխող դիրք ունի, դուք այդտեղ անելիք տեսնու՞մ եք, թե՞ ոչ»:
Վարչապետը անդրադառնալով հարցերին նշեց. «Ինչպես եմ վերաբերվում Սերժ Սարգսյանին՝ շատ հարգալից:
Ձեր հարցը բավականին բազմազան էր. թե կառավարության անդամներն ինձ ինչպես են վերաբերվում՝ հարցրեք իրենցից: Սերժ Սարգսյանի ծրագրերը շարունակական են, այո. Ս. Սարգսյանն է ինձ հրավիրել՝ որպես վարչապետ: Ինչպե՞ս ենք պայքարելու Սամվել Ալեքսանյանի, Միհրան Պողոսյանի և այլոց մոնոպոլիաների դեմ. Շատ պարզ. Խաղի կանոնները բոլորի համար լինելու են նույնը: Լինելու է բաց դաշտ, ով այդ ոլորտում ավելի հաջողակ կլինի, ժամանակը ցույց կտա»:
Մանրամասները՝ տեսանյութում:
