Ազգային ժողովի արտահերթ նիստում երեկ ավարտվեց Ընտրական օրենսգրքի փոփոխությունների նախագծի քննարկումը։
Հիշեցնենք, որ իշխանությունների և «Բարգավաճ Հայաստանի», Հայ ազգային կոնգրեսի և «Օրինաց երկրի» (ՀՎԿ) միջև ավելի վաղ ձեռք էր բերվել պայմանավորվածություն, ըստ որի՝ ընտրություններից հետո հրապարակվելու են ընտրությանը մասնակցած քաղաքացիների ցուցակները։
Այս պահանջի բավարարմանը ընդդիմությունը դեռ վաղուց էր ձգտում, սակայն իշխանությունները համաձայնեցին միայն այն բանից հետո, երբ իրենց իսկ պատճառով տապալվեցին «4+4+4» ձևաչափով ձեռք բերված առաջին պայմանավորվածությունները ընտրողների մատնահետքերի և մի շարք այլ ուշագրավ հարցերի շուրջ։
Երկու դեպքում էլ «4+4+4» ձևաչափով քննարկումներին մասնակցած քաղհասարակության ներկայացուցիչները իշխանությունների հետ համաձայնության չեկան, հատուկ կարծիք կազմեցին այն մասին, որ ձեռք բերված պայմանավորվածությունը թեպետ լավն է, բայց ընտրությունների որակը չի լավացնելու և ընտրակեղծիքները չի կանխելու։
«Առաջին լրատվական»-ի հետ զրույցում «Իրազեկ քաղաքացիների միավորում» հասարակական կազմակերպության ծրագրերի համակարգող Դանիել Իոննիսյանը նշեց, որ Ընտրական օրենսգիրքը անգամ այս փոփոխություններով ավելի վատն է, քան 2011 թվականի ԸՕ-ն. «Ընտրական օրենսգրքում սահմանված է շատ խայտառակ ընտրակարգ, սահմանափակված են ընտրություններին հանրության վերահսկողության հնարավորությունները։ Այդուհանդերձ, այս փոփոխությունները՝ ընտրատեղամասերում տեսախցիկների տեղադրումն ու ընտրացուցակների հրապարակումը, դրական են»,- ասաց Իոննիսյանը։
Նրա կարծիքով՝ Ազգային ժողովում օրենսգրքի փոփոխությունները կանցնեն ձայների բավականին մեծ քանակությամբ. «Հարցն այն է, որ նախկինում ընտրությունների ժամանակ իշխանությունը վերարտադրվում էր տեղամասերում ձայներ կեղծելով։ Հիմա իշխանությունը դրա կարիքը չունի, իշխանությունն այնպիսի ընտրակարգ է մտածել, որ չստանալով ձայների մեծամասնությունը՝ կարող է հաղթել ընտրություններում։ Մենք դա շատ մեղմ արտահայտմամբ տեսանք Գյումրիում և Վանաձորում, որտեղ իշխանությունը ստանալով 40 տոկոսից պակաս՝ հաղթեց երկու տեղերում էլ. մի տեղում՝ ընտրակարգի, մյուս տեղում՝ քաղաքական ինտրիգների արդյունքում»,- ընդգծեց մեր զրուցակիցը՝ հավելելով, որ նույնը շատ ավելի վատ տարբերակով կլինի նաև հաջորդ ընտրությունների ժամանակ, եթե ընդդիմության կոնսոլիդացիա չլինի ընտրություններից առաջ։
Ինչ վերաբերում է բուն «4+4+4» ձևաչափով քննարկումներին իրենց մասնակցությանը և մեր այն հարցին, թե արդարացվա՞ծ էր արդյոք այդ մասնակցությունը, Իոննիսյանը պատասխանեց. «Այդ քննարկումները բավականին ծանր էին, դժվար և նյարդային։ Անձամբ ես չէի պատկերացնում, որ այդքան դժվար է լինելու։ Բայց ենթադրում եմ, որ մենք այլ հնարավորություն չունեինք։ Եթե մենք չմասնակցեինք, ապա իշխանությունը դրանից կօգտվեր, և մենք կունենայինք էլ ավելի վատ Ընտրական օրենսգիրք»:
