The Verge-ի փոխանցմամբ՝ Դեմոկրատական կուսակցությունից ԱՄՆ նախագահի թեկնածու Հիլարի Քլինթոնի շտաբը փոխնախագահի պաշտոնում դիտարկել է Apple ընկերության ղեկավար Թիմ Կուկի ու Microsoft ընկերության հիմնադիր Բիլ Գեյթսի թեկնածությունները։
Այդ մասին հայտնել է WikiLeaks պորտալը՝ վկայակոչելով Քլինթոնի ընտրական արշավի ղեկավար Ջոն Պոդեստայի նամակներից մեկը։ Գեյթսից բացի, թեկնածուների ցուցակում ընդգրկվել է նաև նրա կին Մելինդան։
Բացի այդ, նշվել են նաև General Motors-ի ղեկավար Մերի Բարայի, Xerox-ի ղեկավար Ուրսուլա Բեռնսի, Starbucks-ի ղեկավար Հովարդ Շուլցի, ինչպես նաև Նյու Յորքի նախկին քաղաքապետ, գործարար Մայքլ Բլումբերգի անունները։
Ընդհանուր առմամբ ցուցակում տեղ է գտել մոտ 40 անուն։ Վերջնական ընտրության արդյունքները հայտնի չեն։ Ավելի վաղ հաղորդվել էր, որ WikiLeaks-ը հրապարակել է Քլինթոնի շտաբի ղեկավարի նամակագրության 9-րդ մասը։
