Թուրքական Cumhuriyet թերթի փոխանցմամբ՝ Թուրքիայի ԱԳՆ-ի խոսնակ Թանժու Բիլգիչը դատապարտել է Ֆրանսիայի Սենատի կողմից Հայոց ցեղասպանության ժխտումը քրեականացնող օրինագծի ընդունումը:
Բիլգիչը հիշեցրել է, որ Ֆրանսիայի Սենատը 156 կողմ, 146 դեմ ձայների հարաբերակցությամբ այդ օրինագիծը ընդունել է հոկտեմբերի 14-ին, իսկ հուլիսի 6-ին այն ընդունել էր Ֆրանսիայի Ազգային ժողովը:
Բիլգիչի խոսքով՝ այդ օրինագիծը «հակասում» է ՄԻԵԴ-ի նախադեպին (Դողու Փերինչեքի գործով դատավճռին): Բիլգիչն ընդգծել է, որ Ֆրանսիայի խորհրդարանը 2012 թվականին նույնպես ընդունել է նմանատիպ՝ «խոսքի ազատությանը հակասող», «խորհրդարանի օրենսդրական լիազորություններին չհամապատասխանող» օրինագիծ, որը, սակայն, չեղյալ է հայտարարվել Ֆրանսիայի Սահմանադրական խորհրդի կողմից:
Բիլգիչն օրինագծի ընդունումը պայմանավորել է 2017 թվականին Ֆրանսիայում կայանալիք ընտրությունների գործոնով: Նա ընդգծել է, որ Թուրքիան հետևելու է այդ հարցում իրադարձությունների զարգացմանը:
