Վերջին մեկ ամսվա ընթացքում քաղաքական զարգացումներն ակտիվացել են, և գրեթե յուրաքանչյուր օր անակնկալ է լինում: Այսօրվա անակնկալը, թերևս, առաջին նախագահ Լևոն Տեր-Պատրոսյանի հայտարարությունն էր այն մասին, որ առաջիկայում Հայաստանի տնտեսությանը սպառնում է մի նոր աղետ՝ դեֆոլտ: «Առաջին լրատվական»- ի հետ զրույցում «Ազգային անվտանգություն» կուսակցության նախագահ Գառնիկ Իսագուլյանը նշեց, որ առաջին անգամ չէ, որ Լևոն Տեր-Պետրոսյանը բավականին խիստ հայտարարություններ է անում, բայց կյանքը ցույց է տալիս, որ այդ կանխատեսումները իրականության հետ կապ չունեն:
«Գուցե ինքն ինչ-որ նախանշաններ տեսնում է», – նշեց Գ. Իսագուլյանը՝ հավելելով, որ ինքը վստահ է՝ կանցնի մի քանի ամիս, և կտեսնենք, որ Հայաստանը դեֆոլտի առաջ չի կանգնել:
Վերջին շրջանում Տեր-Պետրոսյանը պարբերաբար Սերժ Սարգսյանին սատարող հայտարարություններով ու առաջարկներով էր հանդես գալիս. թե ինչով է պայմանավորված այն, որ Տեր-Պետրոսյանը որոշեց բարձրաձայնել դեֆոլտի մասին, Գ. Իսագուլյանի կարծիքով՝ բացառապես պայմանավորված է նախընտրական շրջանով. «Ինչքան սուր հայտարարություն անի, այնքան արձագանքներն ավելի շատ կլինեն, և այնքան ավելի շատ ուշադրության կետրոնում կլինի: Ընտրություններից առաջ գույները խտացնում են»:
Գնահատելով Վիկտոր Դալլաքյանի՝ ակտիվ քաղաքականություն վերադառնալու հայտը և նրա հնչեցրած հայտարարությունները, Գ. Իսագուլյանը նշեց. «Ցանկացած ՀՀ քաղաքացի իրավունք ունի հայտ ներկայացնել, բայց շատ կարևոր է, թե հայտն ինչով է հիմնավորվում և ինչպես է ներկայացվում: Նա իր ելույթում բավականին ճոխ ներկայացնում էր այն տեսարանները, թե ինքն ինչպես է առաջ եկած խնդիրները լուծել: Օրինակ՝ ներկայացնում էր նաև, թե ինչպես են իրեն առաջարկել այդ պաշտոնները: Ես ականատես եմ եղել և մասնակից: Ես արդեն հրաժարականի դիմում էի ներկայացրել և գիտեի, որ ինձ պետք է փոխարինի Վիկտոր Դալլաքյանը: Առաջին տիկնոջ ծնողը մահացել էր, մենք ԼՂՀ-ում էինք, այնտեղ էր նաև Վեհափառ Հայրապետը, Բակո Սահակյանը, Սերժ Սարգսյանը բնականաբար ներկա էր, իր աներոջ թաղման արարողությունն էր, և այնտեղ, ոտքի վրա Վիկտոր Դալլաքյանը մի քանի րոպե խոսեց ՀՀ նախագահ Ս. Սարգսյանի հետ: Բայց հիմա ներկայացվում է այնպես, կարծես Վեհափառ Հայրապետը, Բակո Սահակյանը և Սերժ Սարգսյանը հատուկ իրեն հրավիրել էին ԼՂՀ, որ իրեն առաջարկեն այդ պաշտոնները»:
Մանրամասները՝ տեսանյութում:
