Երեկ նախագահ Ս. Սարգսյանի աշխատակազմի ղեկավարի տեղակալ և Ազգային ժողովում ՀՀ նախագահի պաշտոնական ներկայացուցիչ Վիկտոր Դալլաքյանը հայտարարեց ՀՀԿ-ից դուրս գալու և ակտիվ քաղաքականություն վերադառնալու մասին: «Առաջին լրատվական»- ի հետ թեմայի շուրջ զրույցում «Ժառանգություն» կուսակցության փոխնախագահ Արմեն Մարտիրոսյանը նշեց. «Այնպես չի լինում, որ մի քանի տարի իշխանական դաշտում ես լինում, առավել ևս բարձրաստիճան պաշտոն ես զբաղեցնում և մեկ րոպեի ընթացքում դառնում ես խիստ ընդդիմադիր, գոնե ինչ-որ ժամանակ պետք է անցնի»: Անդրադառնալով դիտարկմանը, որ Վ. Դալլաքյանը հայտարարել է, որ 4 տարի է՝ «քարեր է հավաքում, և ժամանակն է եկել դրանք նետելու», Ա. Մարտիրոսյանը նշեց. «4 տարի է նախագահի աշխատակազմի ղեկավարի տեղակալ է և քարե՞ր է հավաքում… Կուզենայի, որ նա մնար խորհրդարանում, որպես պրոֆեսիոնալ պատգամավոր: Շատ նորմալ եմ համարում, որ Վ. Դալլաքյանն ուզում է նոր կուսակցություն ստեղծել»:
Արմեն Մարտիրոսյանի դիտարկմամբ՝ Վ. Դալլաքյանը եղել է իշխանության մեջ և կրում է իշխանության վարած քաղաքականության ամբողջ պատասխանատվությունը:
«Ընտրություններից առաջ պետք է տեղ ունենալ քաղաքական դաշտում, թող պայքարի, բայց ես ոչ թե այդ առումով եմ դիտարկում, այլ խնդիրն այն է, թե կարո՞ղ ենք իրական ընդդիմադիրներով իրավիճակ փոխել երկրում: Իրական ընդդիմությունը ցանկանում է համակարգային փոփոխություններ իրականացնել, պատրաստ է իր եսը մի կողմ դնել, գնալ համագործակցության՝ երկրում արմատական փոփոխություններ կյանքի կոչելու համար,- նշեց Ա. Մարտիրոսյանը՝ հավելելով, որ իշխանության գործողությունները մարդկանց ընդդիմադիր են դարձրել:
Ա. Մարտիրոսյանի գնահատմամբ՝ ՏԻՄ ընտրությունները չպետք է ճշմարտության վերջնաղբյուր համարենք, նրա խոսքով՝ մեր քաղաքացիները հասկանում են, որ ՏԻՄ ընտրություններով ոչինչ չի փոխվելու:
«Կառավարության ծրագիրը, ամենայն հավանականությամբ, կգրվի «Գազպրոմում», կհաստատվի Ռուսաստանի պետդումայի դուստր ձեռնարկություն ՀՀ պառլամենտում»,- ընդգծեց Ա. Մարտիրոսյանը:
Մանրամասները՝ տեսանյութում:
