Թուրքական NTV հեռուստաալիքի փոխանցմամբ՝ Թուրքիայի վարչապետ Բինալի Յըլդըրըմը իշխող կուսակցության խորհրդարանական խմբակցության նիստի ժամանակ չի բացառել, որ Սիրիայի հյուսիսում թուրքական բանակի կողմից իրականացվող «Եփրատի վահան» գործողությունը կընդլայնվի Եփրատ գետի արևելյան ափին:
«Մենք ներկայումս խոսում ենք Եփրատի արևմտյան ափի մասին, սակայն եթե ահաբեկիչները շարունակեն իրենց գործունեությունը գետից դեպի արևելք, ապա այնտեղ նույնպես կարող են ձեռնարկվել համապատասխան քայլեր»,- ասել է Թուրքիայի վարչապետը:
Ավելի վաղ Թուրքիայի ԱԳՆ-ն Սիրիայի քրդերից պահանջել էր քաշվել դեպի Եփրատի արևելյան ափ, սակայն Թուրքիայի արտգործնախարար Մևլյութ Չավուշօղլուի խոսքով՝ Սիրիայի քրդերից ավելի քան 200 զինյալ մնացել են Եփրատի արևմտյան ափին գտնվող Մանբիջ քաղաքում:
