Թուրքական Anadolu լրատվական գործակալության փոխանցմամբ՝ Թուրքիայի վարչապետ Բինալի Յըլդըրըմը քննադատել է Իրաքի վարչապետ Հայդար ալ-Աբադիին՝ Իրաքի հյուսիսում թուրք հրահանգիչների ներկայության վերաբերյալ նրա արած հայտարարությունների կապակցությամբ:
Մեկնաբանելով ալ-Իբադիի այն խոսքերը, որ «թուրք զինվորականները չպետք է Իրաքում իրենց զգան այնպես, ինչպես տանը», Թուրքիայի վարչապետը հայտարարել է. «Զինվորականները կատարում են իրենց պարտականությունները, պայքարում են ԴԱԻՇ-ի ահաբեկիչների դեմ, որոնք դարձել են համայն մարդկության դժբախտությունը»:
Յըլդըրըմը հիշեցրել է, որ Սիրիայում կամ Իրաքում ԴԱԻՇ-ի դեմ պայքարում է ոչ միայն Թուրքիան, այլև՝ ավելի քան 60 երկիր՝ ԱՄՆ-ի, Ռուսաստանի գլխավորությամբ:
«Իրաքում ներկայումս գտնվում են այն երկրների հրահանգիչներն ու զինծառայողները, որոնք որևէ կապ չունեն այդ պետության հետ: Այդ պայքարը շարունակվում է հանուն մարդասիրության:
Այդ պատճառով էլ ես կարծում եմ, որ Բաղդադի նման հայտարարությունները շատ վտանգավոր և սադրիչ են: Մեր զինվորականներն առաջին օրը չէ, որ գտնվում են Բաշիքայում»,- ասել է Թուրքիայի վարչապետը:
