Ինչպես արդեն հայտնի է, ՀՀ նախագահ Սերժ Սարգսյանը կատարեց կառավարության ձևավորման վերջին նշանակումները՝ արտգործնախարարի պաշտոնում վերանշանակվեց Էդվարդ Նալբանդյանը, իսկ Վիգեն Սարգսյանը փոխարինեց պաշտպանության նախարար Սեյրան Օհանյանին:
Մեկնաբանելով այս նշանակումները՝ ԱԺ ՀՀԿ խմբակցության ղեկավար Վահրամ Բաղդասարյանը «Առաջին լրատվական»-ի հետ զրույցում ասաց. «Պաշտպանության նախարարի փոփոխությունը ի սկզբանե մենք կանխատեսում էինք, որովհետև սահմանադրական բարեփոխումներից հետո՝ շտաբի պետի և նախարարի ֆունկցիաների բաժանումը ինքնըստինքյան ենթադրում էր, որ ավելի նպատակահարմար է պաշտպանության նախարարի պաշտոնում լինի ավելի շատ քաղաքացիական անձ, քան ռազմական գործիչ: Իսկ Շտաբի պետը դառնում է թիվ մեկ զինվորականը»:
Հարցին՝ իսկ ինչո՞վ էր պայմանավորված Էդվարդ Նալբանդյանի վերանշանակումը, որքանո՞վ էր այն կապված Ռուսաստանի կամքի հետ, Վահրամ Բաղդասարյանը պատասխանեց. «Արտաքին քաղաքականության մեջ մենք ունեցել ենք բավականին ձեռքբերումներ՝ ապրիլյան պատերազմից հետո մենք կարողացել ենք պահպանել մեր դիրքերը և դուրս ենք եկել պատվով և հաղթանակով:
Ես բացահայտ հայտարարում եմ՝ մեր կադրային հարցերը կարգավորում ենք մենք և որևէ գերտերության, որևէ պետության հետ խորհրդակցելու կարիք չունենք»:
ԱԺ ՀՀԿ խմբակցության ղեկավարը հավաստիացրեց, որ որևէ միջնորդություն չի եղել:
