ՌԴ ԱԳՆ ղեկավար Սերգեյ Լավրովը հայտարարել է, որ Սիրիայի նախագահ Բաշար Ասադի հեռանալը երբեք չի եղել Սիրիայի հարցով ոչ մի համաձայնագրի պայման: Այս մասին Լավրովն ասել է BBC World հեռուստաալիքին տված հարցազրույցում:
«Սիրիայի վերաբերյալ առաջին փաստաթղթից՝ սկսած 2012թ. հունիսի Ժնևյան կոմյունիկեից, մենք ամեն ինչ արեցինք՝ համոզվելու համար, որ կառավարությունը կհամագործակցի, նրանք այդ փաստաթուղթը ստորագրել են այն ընդունելուց մի քանի օր հետո… Միայն մեկ տարի և մի քանի ամիս անց սիրիական ընդդիմությունը դժկամությամբ հայտարարել է, որ իրենք պատրաստ են աջակցել այդ փաստաթղթին, եթե Ասադը հեռանա, ինչն այդ փաստաթղթի պայման չէր»,- ասել է Լավրովը:
Նա նաև նշել է, որ Սիրիայի հարցով համաձայնագիրը կգործի միայն այն դեպքում, եթե ԱՄՆ-ը բաժանի ընդդիմությանը և ահաբեկիչներին:
Լավրովի խոսքով՝ Ռուսաստանը Սիրիայում չի կիրառում միջազգային իրավունքի նորմերով արգելված ռազմամթերք:
«Մենք չենք կիրառում ՄԱԿ-ի կողմից արգելված ոչ մի ռազմամթերք: Կարող եք վստահ լինել»,- ասել է Լավրովը:
Լավրովի խոսքով՝ Սիրիայում քաղաքացիական բնակչության ուղղությամբ հարվածներ հասցնելու համար Մոսկվային մեղադրելուց առաջ անհրաժեշտ է «համոզիչ ապացույցներ» ներկայացնել:
