Այսօր երգչուհի Արմինկան միացել էր «Freecar, չեմ վճարելու 150 դրամ» ակցիային և իր սեփական ավտոմեքենայով ուղևորափոխադրում իրականացրել: «Առաջին լրատվական»-ի հետ զրույցում նա նշեց. «Ինչպես ամբողջ ժողովուրդը, այնպես էլ ես իմ բողոքն եմ հայտնում թանկացման վերաբերյալ։ Սա միակ թանկացումը չէր, սա արդեն ժողովրդի համբերության բաժակը լցրեց, ես էլ այսօր իմ մեքենայով փորձել եմ մարդկանց տեղափոխել՝ ի նշան ուղեվարձի թանկացման բողոքի և աջակցության»:
Հարցին, թե ինչու շոու բիզնեսը որոշեց միանալ հանրության պահանջին, Արմինկան նշեց, որ շոու բիզնեսում նույն շարքային քաղաքացիներն են, և բոլորի խնդիրները նաև իրենց խնդիրներն են, ինչպես նաև՝ շոու բիզնեսի խնդիրները բոլորի խնդիրներն են: «Սա էլ համբերության բաժակը լցվելու նման էր, և մարդիկ էլ որոշեցին իրենց ձայնը բարձրացնել և հնչեցնել»,- ասաց նա:
Հարցադրմանը՝ բայց չէ՞ որ շոու բիզնեսն իշխանությունների հետ փոխկապակցված է, որևէ ակցիայի այսքան ժամանակ գրեթե չի մասնակցել, երգչուհին պատասխանեց. «Կարող եմ ասել, որ ինչպես բոլոր բնագավառներում, շոու բիզնեսում էլ կան մարդիկ, ովքեր որոշակի կախվածություն ունեն իշխանություններից, և կան մարդիկ, ովքեր ընդհանրապես կախվածություն չունեն նրանցից»:
Եթե ես որևէ որոշում եմ կայացնում, երբեք իմ որոշումներից հետ չեմ կանգնում և իմ ակտիվությունը կշարունակեմ ցուցաբերել այս հարցում: Եվ ես միշտ էլ ժողովրդի կողքին եմ, որովհետև ես ժողովրդի մի մասնիկն եմ, ոչ մի բանով չեմ տարբերվում, ինչպես ես, այնպես էլ իմ ընտանիքի բոլոր անդամները։ Մենք այս երկրի քաղաքացիներ ենք, և եթե ես երգչուհի եմ, մյուսը՝ ուսուցչուհի, չի նշանակում, որ ինչ-որ բանով տարբեր ենք։ Մենք միայն մասնագիտություններով ենք տարբեր։ Որպես քաղաքացի՝ բոլորս հավասար ենք: Ես, համենյանդեպս, այսպես եմ դաստիարակվել»,- ասաց Արմինկան:
