ՄԱԿ-ի ԱԽ-ի արտահերթ խորհրդակցության ժամանակ Քերին հայտարարել է, որ Սիրիայի Հալեպի շրջաններում, որտեղ ոչնչացվել է հումանիտար ավտոշարասյունը, գործում է միայն ռուսական և սիրիական ավիացիան, հայտնում է BBC-ն:
Քերիի խոսքով` առաջ շարժվելու և շրջանում հրադադար սահմանելու համար անհրաժեշտ է բոլոր թռիչքները անհապաղ դադարեցնել: Դա թույլ կտա նաև նորացնել երկրի բնակիչների հումանիտար օգնությունը:
Քերին նաև հիշեցրել է, որ Ժնևում ռուսական կողմը հավաստիացրել էր, որ Սիրիայի նախագահ Բաշար Ասադը պատրաստ է հրադադարի և համաձայն է, որ սիրիական ինքնաթիռները չթռչեն որոշ շրջաններում:
ՌԴ արտգործնախարար Սերգեյ Լավրովը նիստի ընթացքում կոչ է արել հումանիտար ավտոշարասյան վրա հարձակման անկողմնակալ հետաքննություն անցկացնել: Նա նաև հայտնել է, որ հրադադարը պահպանում են միայն կառավարական զորքերը, իսկ ընդդիմությունը այն շատ անգամ խախտել է:
Ի պատասխան դրան՝ Քերին հայտարարել է, որ Լավրովի ելույթի ժամանակ իր մեջ «զուգահեռ իրականության» զգացողություն է առաջացել:
